കല്പ്പറ്റ: പത്തുനാള് നീണ്ട രക്ഷാദൗത്യത്തിന് വിരാമമിട്ട് വയനാട്ടിലെ ദുരന്തബാധിത പ്രദേശങ്ങളായ മുണ്ടക്കൈ, ചൂരല്മല എന്നിവിടങ്ങളില് നിന്നും സൈന്യം മടങ്ങുന്നു. തിരുവനന്തപുരം, കോഴിക്കോട്, കണ്ണൂര്, ബെംഗളുരു എന്നിവിടങ്ങളില് നിന്നുള്ള 500 അംഗ ബറ്റാലിയനാണ് മടങ്ങുന്നത്. സൈന്യത്തിന് സര്ക്കാരും ജില്ലാ ഭരണകൂടവും യാത്രയയപ്പ് നല്കും. രക്ഷാപ്രവര്ത്തനം പൂര്ണമായും എന്ഡിആര്എഫ്, എസ്ഡിആര്എഫ്, ഫയര്ഫോഴ്സ്, പൊലീസ് എന്നീ സേനകള്ക്ക് കൈമാറുമെന്നും സൈന്യം അറിയിച്ചു.
താല്ക്കാലികമായി നിര്മ്മിച്ച ബെയ്ലി പാലം മെയ്ന്റനന്സ് ടീം പ്രദേശത്ത് തുടരും. ഹെലികോപ്റ്റര് സെര്ച്ച് ടീമും അടുത്ത നിര്ദേശം വരുന്നത് വരെ തുടരും. ബാക്കിയുള്ളവരാണ് മടങ്ങുകയെന്നും സൈന്യം അറിയിച്ചു.
ഇതുവരെ 413 മരണമാണ് സ്ഥിരീകരിച്ചത്. 16 ക്യാംപുകളിലായി 1968 പേരുമുണ്ട്. ഇവരുടെ പുനരധിവാസത്തിനായി വാടക വീടുകള് കണ്ടെത്തുന്ന നടപടികളും തുടരുകയാണ്.
