കൊല്ക്കത്ത: പശ്ചിമബംഗാളിലെ മാല്ഡ സംഘര്ഷത്തിലെ മുഖ്യസൂത്രധാരന് പൊലീസ് പിടിയില്. അഖിലേന്ത്യ മജ്ലിസെ ഇത്തിഹാദുല് മുസ്ലിമീന് (എഐഎംഐഎം) നേതാവ് മൊഫക്കറുള് ഇസ്ലാം രാജ്യം വിടാനുള്ള ശ്രമത്തിനിടെയാണ് ആണ് പിടിയിലായത്.
സിലിഗുഡിയിലെ ബാഗ്ഡോഗ്ര വിമാനത്താവളത്തില് വെച്ചാണ് ഇയാളെ പൊലിസ് അറസ്റ്റ് ചെയ്തത്. സംഭവവുമായി ബന്ധപ്പെട്ട് 35 പേരെ അറസ്റ്റ് ചെയ്തതായും പൊലീസ് അറിയിച്ചു. മാല്ഡ ജില്ലയില്, എസ്ഐആര് പട്ടികയില് പേരുവെട്ടിയെന്ന ആരോപണത്തില് പ്രതിഷേധിച്ച് ജുഡീഷ്യല് ഉദ്യോഗസ്ഥരെ ഒന്പതുമണിക്കൂറിലേറെ തടഞ്ഞുവച്ചിരുന്നു.
അഭിഭാഷകനായ ഇസ്ലാം, 2021-ലെ പശ്ചിമ ബംഗാള് നിയമസഭാ തെരഞ്ഞെടുപ്പില് ഇതഹാര് മണ്ഡലത്തില് നിന്നുള്ള എഐഎംഐഎം സ്ഥാനാര്ത്ഥിയായിരുന്നു.
പശ്ചിമ ബംഗാള് നിയമസഭാ തെരഞ്ഞെടുപ്പിന് മുന്നോടിയായി വോട്ടര്പട്ടിക പുതുക്കുന്ന ചുമതലയിലായിരുന്ന ഏഴ് ജുഡീഷ്യല് ഓഫീസര്മാരെയാണ് മാള്ഡയിലെ കാലിയാചക് 2 ബ്ലോക്ക് ഡെവലപ്മെന്റ് ഓഫീസില് വെച്ച് ജനക്കൂട്ടം തടഞ്ഞുവെച്ചത്. തടഞ്ഞുവെക്കപ്പെട്ടവരില് മൂന്ന് വനിത ഓഫീസര്മാരും ഉള്പ്പെട്ടിരുന്നു. സംഭവം ഉദ്യോഗസ്ഥരെ ഭയപ്പെടുത്താനും തെരഞ്ഞെടുപ്പ് പ്രക്രിയയെ അട്ടിമറിക്കാനുമുള്ള ആസൂത്രിത നീക്കമാണെന്ന് സുപ്രീം കോടതി നിരീക്ഷിച്ചു. സ്വമേധയാ കേസെടുത്ത കോടതി കേന്ദ്രസേനയെ വിന്യസിക്കാന് ഉത്തരവിടുകയും, ഏപ്രില് 6ന് വെര്ച്വല് ഹിയറിങ്ങിന് ഹാജരാവാന് ബംഗാള് ഡിജിപിക്ക് നിര്ദേശം നല്കുകയും ചെയ്തിട്ടുണ്ട്.
സംഭവത്തില് സംസ്ഥാന ഭരണകൂടത്തിന്റെ പൂര്ണ പരാജയമാണ് വ്യക്തമാകുന്നതെന്നും, മമത ബാനര്ജി സര്ക്കാരിനെ കോടതി അതിനിശിതമായി വിമര്ശിച്ചു. മാള്ഡയില് ജുഡീഷ്യല് ഓഫീസര്മാരെ തടഞ്ഞത് അതീവ ഗൗരവത്തോടെയാണ് കോടതി കാണുന്നത്. ബംഗാള് ചീഫ് സെക്രട്ടറി, ആഭ്യന്തര സെക്രട്ടറി, ഡിജിപി എന്നിവരുടെ പ്രവര്ത്തനം പരിതാപകരമാണെന്നും ചീഫ് ജസ്റ്റിസ് അധ്യക്ഷനായ ബെഞ്ച് വിമര്ശിച്ചു.
മാല്ഡ സംഘര്ഷം: മുഖ്യസൂത്രധാരന് പിടിയില്
