തപാല് വകുപ്പിന് ലൈസന്സ് ഉള്പ്പെടെയുള്ളവ വിതരണം ചെയ്ത വകയില് കിട്ടാനുള്ള തുക കുടിശ്ശികയായതോടെ സംസ്ഥാന മോട്ടോര് വാഹന വകുപ്പുമായുള്ള കരാര് തപാല്വകുപ്പ് റദ്ദാക്കി. ഇതോടെ മോട്ടോര് വാഹന വകുപ്പില്നിന്ന് ലൈസന്സ്, ആര്.സി. ഉള്പ്പെടെയുള്ള രേഖകള് സ്പീഡ് പോസ്റ്റില് അയക്കാതായി. ഇവ മോട്ടോര് വാഹനവകുപ്പ് ഓഫീസില് കെട്ടിക്കിടക്കുകയാണ്.
2.08 കോടി രൂപയാണ് മോട്ടോര് വാഹന വകുപ്പ് തപാല്വകുപ്പിന് നല്കാനുള്ളത്. 2023 ജൂലായ് മുതല് സെപ്റ്റംബര് വരെയുള്ള തുകയാണിത്. നവംബര് ഒന്നുമുതലാണ് മോട്ടോര് വാഹനവകുപ്പുമായുള്ള ബി.എന്.പി.എല്. ( ഇപ്പോള് ബുക്ക് ചെയ്യുക പിന്നീട് പണമടയ്ക്കുക സൗകര്യം) കരാര് തപാല്വകുപ്പ് അവസാനിപ്പിച്ചത്.
