കോട്ടയം: കാഞ്ഞിരപ്പള്ളി അമല് ജ്യോതി എന്ജിനീയറിങ് കോളേജ് അനിശ്ചിത കാലത്തേക്ക് അടച്ചു. ബിരുദ വിദ്യാര്ത്ഥിനിയുടെ ആത്മഹത്യയുമായി ബന്ധപ്പെട്ട് പ്രതിഷേധം നടക്കുന്ന സാഹചര്യത്തിലാണ് കോളേജ് അനിശ്ചിത കാലത്തേക്ക് അടച്ചത്. ഹോസ്റ്റല് ഒഴിയാന് വിദ്യാര്ഥികള്ക്ക് നിര്ദ്ദേശം നല്കി. ഹോസ്റ്റല് ഒഴിയില്ലെന്നാണ് വിദ്യാര്ത്ഥികളുടെ നിലപാട്.
മാനേജ്മെന്റ് അധികൃതര് വിദ്യാര്ത്ഥികളുമായി ചര്ച്ച നടത്തിയിരുന്നെങ്കിലും വിദ്യാര്ത്ഥികള് ഉന്നയിച്ച പ്രശ്നങ്ങളില് കൃത്യമായ തീരുമാനങ്ങള് ഉണ്ടായിരുന്നില്ല. ഈ സാഹചര്യത്തിലാണ് ആരോപണ വിധേയരായ അധ്യാപകരെ ഉള്പ്പെടെ പങ്കെടുപ്പിച്ചുകൊണ്ട് ഇന്ന് വിപുലമായ യോഗം ചേരാന് തീരുമാനിച്ചത്.
രണ്ടാം വര്ഷ വിദ്യാര്ഥിനിയായിരുന്ന ശ്രദ്ധ ആത്മഹത്യ ചെയ്തത് കോളേജിലെ ചില അധ്യാപകരുടെ മാനസിക പീഡനത്തെ തുടര്ന്നാണെന്നാണ് സഹപാഠികളുടെ ആരോപണം. ആത്മഹത്യയിലേക്ക് നയിച്ച സംഭവങ്ങളെ പറ്റിയും ശ്രദ്ധയെ ആശുപത്രിയില് എത്തിച്ചതിനുശേഷം അധ്യാപകരുടെ ഭാഗത്തുണ്ടായ വീഴ്ചകളെ പറ്റിയും വിശദമായ ചര്ച്ച നടത്തണമെന്നാണ് വിദ്യാര്ത്ഥികളുടെ ആവശ്യം. ശ്രദ്ധയുടെ ആത്മഹത്യമായി ബന്ധപ്പെട്ട കൂടുതല് വിദ്യാര്ത്ഥികളുടെ മൊഴിയെടുക്കാനുള്ള നടപടികള് ഇന്ന് തുടങ്ങുമെന്ന് പൊലീസും അറിയിച്ചു.
