വിദേശ ഭാഷയിലെ സ്വതന്ത്ര സിനിമകളിലെ മികച്ച പശ്ചാത്തലസംഗീതത്തിന് നല്‍കുന്ന 2024ലെ അന്തര്‍ ദേശീയ സംഗീത പുരസ്‌കാരമായ ഹോളിവുഡ് മ്യൂസിക് ഇന്‍ മീഡിയാ പുരസ്‌കാരം സ്വന്തമാക്കി എ.ആര്‍.റഹ്‌മാന്റെ ആടുജീവിതത്തിലെ പെരിയോനേ റഹ്‌മാനേ എന്ന ഗാനം. റഫീഖ് അഹമ്മദാണ് വരികളെഴുതിയത്. ജിതിന്‍രാജാണ് ഗാനം ആലപിച്ചത്. ഫീച്ചര്‍ ഫിലിം ഗാനവിഭാഗത്തിലായിരുന്നു പെരിയോനേ മത്സരിച്ചത്.
ലോസ് ആഞ്ജലിസില്‍ നടന്ന ചടങ്ങില്‍ എ.ആര്‍. റഹ്‌മാനുവേണ്ടി സംവിധായകന്‍ ബ്ലെസി പുരസ്‌കാരം ഏറ്റുവാങ്ങി.
ചാലഞ്ചേഴ്‌സ്, എമിലിയ പേരെസ്, ബെറ്റര്‍മാന്‍, ട്വിസ്റ്റേഴ്‌സ്, ദ ഐഡിയ ഓഫ് യു, ദ സിക്‌സ് ട്രിപ്പിള്‍ എയ്റ്റ്, ബ്ലിറ്റ്‌സ് എന്നിവയാണ് ആടുജീവിതത്തിനുപുറമേ ഫീച്ചര്‍ ഫിലിം ഗാന വിഭാഗത്തില്‍ മത്സരിച്ച മറ്റുചിത്രങ്ങള്‍. ഫിലിം, ടിവി, വീഡിയോ ഗെയിമുകള്‍, ട്രെയിലറുകള്‍, പരസ്യങ്ങള്‍, ഡോക്യുമെന്ററികള്‍, പ്രത്യേക പരിപാടികള്‍ തുടങ്ങി എല്ലാ ദൃശ്യമാധ്യമങ്ങളിലേയും ഒറിജിനല്‍ സംഗീതത്തെ ആദരിക്കുന്നതിനായി ഹോളിവുഡ് മ്യൂസിക് ഇന്‍ മീഡിയ അക്കാദമി നല്‍കുന്ന പുരസ്‌കാരമാണിത്. ചിത്രത്തിലെ പാട്ടുകള്‍ സൂപ്പര്‍ഹിറ്റുകളായിരുന്നെങ്കിലും ജിതിന്‍ രാജ് ആലപിച്ച പെരിയോനേ എന്ന ഗാനം മലയാളികള്‍ നെഞ്ചേറ്റിയതാണ്. മലയാളത്തിലെ ഒരുഗാനത്തിനും എത്താന്‍ കഴിയാതിരുന്ന ഒരു നേട്ടം കൈവരിച്ചിരിക്കുകയാണ് ഇപ്പോള്‍ ഈ ഗാനം.
പൃഥ്വിരാജിനെ നായകനാക്കി ബ്ലെസി സംവിധാനംചെയ്ത ആടുജീവിതത്തിലൂടെ എ ആര്‍ റഹ്‌മാനെ ഒന്നുകൂടി മലയാൡകള്‍ ഹൃദയത്തോടു ചേര്‍ത്തുനിര്‍ത്തി.
