തിരുവനന്തപുരം: ആലപ്പുഴയില് അപൂര്വ്വ രോഗം ബാധിച്ച് 15കാരന് മരിച്ചു. അമീബിക്ക് മെനിഞ്ചോ എന്സെഫലൈറ്റിസ് രോഗം സ്ഥിരീകരിച്ച പാണാവള്ളിയിലെ 15കാരനാണ് മരിച്ചത്. രോഗം കഴിഞ്ഞ ദിവസമാണ് സ്ഥിരീകരിച്ചത്. മനുഷ്യരില് നിന്ന് മനുഷ്യരിലേക്ക് രോഗം പടരില്ലെന്നും ആശങ്ക വേണ്ടെന്നും ആരോഗ്യമന്ത്രി വീണാ ജോര്ജ് വ്യക്തമാക്കി.
വെള്ളത്തില് ജീവിക്കുന്ന അമീബ രോഗാണുവാണ് രോഗം പരത്തുന്നത്. പരാദ സ്വഭാവമില്ലാതെ ജലത്തില് സ്വതന്ത്രമായി ജീവിക്കുന്ന അമീബ വിഭാഗത്തില്പ്പെടുന്ന രോഗാണുക്കള് നീര്ച്ചാലിലോ കുളത്തിലോ കുളിക്കുന്നത് വഴി മൂക്കിലെ നേര്ത്ത തൊലിയിലൂടെ മനുഷ്യന്റെ ശരീരത്തില് കടക്കുകയും തലച്ചോറിനെ ഗുരുതരമായി ബാധിക്കുന്ന എന്സെഫലൈറ്റിസ് ഉണ്ടാക്കാനിടയാക്കുകയും ചെയ്യുന്നു. പനി, തലവേദന, ഛര്ദി, അപസ്മാരം എന്നിവയാണ് പ്രധാന രോഗ ലക്ഷണങ്ങള്. അഞ്ചു വര്ഷത്തിന് ശേഷമാണ് ആലപ്പുഴയില് ഈ രോഗം റിപ്പോര്ട്ട് ചെയ്യുന്നത്.
മലിനമായ വെള്ളത്തില് മുങ്ങി കുളിക്കുന്നതും, മുഖവും വായും ശുദ്ധമല്ലാത്ത വെള്ളത്തില് കഴുകുന്നതും രോഗം വരുവാന് കാരണ മാകുന്നതിനാല് അത് പൂര്ണ്ണമായും ഒഴിവാക്കുക. മഴ തുടങ്ങുമ്പോള് ഉറവ എടുക്കുന്ന നീര്ചാലുകളില് കുളിക്കുന്നതും ഒഴിവാക്കുക. മലിനജലം കെട്ടിക്കിടക്കുന്ന സാഹചര്യം ഒഴിവാക്കണമെന്ന് ഡി.എം.ഒ അറിയിച്ചു.
