തിരുവനന്തപുരം: നിയമസഭ പാസാക്കിയ ബില്ലുകളിൽ ഒപ്പിടാത്ത ഗവർണറുടെ നടപടിക്കെതിരെ കോടതിയെ സമീപിക്കാനൊരുങ്ങി സർക്കാർ. ഇത് സംബന്ധിച്ച് സർക്കാർ അഡ്വക്കറ്റ് ജനറലിൻറെ (എ.ജി) ഉപദേശം തേടി.
ബില്ലുകളിൽ തീരുമാനമെടുക്കാത്ത ഗവർണറുടെ അസാധാരണ നടപടി ജനാധിപത്യത്തോടുള്ള വെല്ലുവിളിയാണെന്നും ഇതിനെതിരെ കോടതിയെ സമീപിക്കുന്നത് സർക്കാർ ആലോചിക്കുന്നതായും കഴിഞ്ഞ ദിവസം നിയമമന്ത്രി കൂടിയായ പി. രാജീവ് വ്യക്തമാക്കിയിരുന്നു. ഇതിന് പിന്നാലെയാണ് സർക്കാർ എ.ജിയിൽനിന്ന് നിയമോപദേശം തേടിയത്.
അതേസമയം, ബില്ലുകൾ കേന്ദ്ര സർക്കാറിന്റെയും രാഷ്ട്രപതിയുടെയും പരിഗണനക്ക് എത്തിക്കാനുള്ള നീക്കത്തിലാണ് രാജ്ഭവൻ. സർക്കാർ കോടതിയിലേക്ക് നീങ്ങുന്നതോടെ ചെറിയൊരു ഇടവേളയ്ക്ക് ശേഷം ഗവർണറും സർക്കാരും തമ്മിലുള്ള പുതിയൊരു ഏറ്റുമുട്ടലിന് കളമൊരുങ്ങും.
