തിരുവനന്തപുരം: സംസ്ഥാനത്ത് കാലവര്ഷം ശക്തി പ്രാപിക്കുകയാണ്. ഇന്നും ശക്തമായ മഴയ്ക്ക് സാധ്യതയുണ്ടെന്നാണ് കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പ്. 11 ജില്ലകളില് യെല്ലോ അലര്ട്ട് പ്രഖ്യാപിച്ചു. തിരുവനന്തപുരം,കൊല്ലം,പത്തനംതിട്ട ഒഴികെയുള്ള ജില്ലകളിലാണ് അലര്ട്ട് പ്രഖ്യാപിച്ചിരിക്കുന്നത്.
വടക്കന് ജില്ലകളിലാണ് കൂടുതല് മഴ സാധ്യത. ഒറ്റപ്പെട്ടയിടങ്ങളില് അതിശക്തമായ മഴ കിട്ടും. കച്ചിനും സമീപപ്രദേശങ്ങള്ക്കം മുകളിലായി നിലനില്ക്കുന്ന ന്യൂനമര്ദ്ദവും, ഗുജറാത്ത് തീരം മുതല് കര്ണാടക തീരം വരെയുള്ള ന്യൂനമര്ദ്ദ പാത്തിയുമാണ് മഴ തുടരാന് കാരണം.
ശക്തമായ മഴ തുടരുന്ന സാഹചര്യത്തില് ഇടുക്കി, കണ്ണൂര് ജില്ലകളിലെ എല്ലാ വിദ്യാഭ്യാസ സ്ഥാപനങ്ങള്ക്ക് അവധി പ്രഖ്യാപിച്ചിട്ടുണ്ട്. എന്നാല്, മുന്കൂട്ടി നിശ്ചയിച്ച അഭിമുഖങ്ങള്ക്കും പരീക്ഷകള്ക്കും മാറ്റമുണ്ടാകില്ല. നാളെ രാത്രി വരെ കേരള തീരത്ത് ശക്തമായ കടലാക്രമണത്തിന് സാധ്യത ഉണ്ടെന്നാണ് ദേശീയ സമുദ്ര ഗവേഷണ കേന്ദ്രത്തിന്റെ മുന്നറിയിപ്പ്. നാല് മീറ്റര് വരെ ഉയരമുള്ള തിരകള് ഉണ്ടാകും. മണിക്കൂറില് 65 കിലോ മീറ്റര് വരെ വേഗത്തില് കാറ്റ് വീശാനും സാധ്യതയുണ്ട്. അതിനാല് ഞായറാഴ്ച വരെ മത്സ്യത്തൊഴിലാളികള് കടലില് പോകരുത്. തീരപ്രദേശത്ത് താമസിക്കുന്നവരും ശ്രദ്ധിക്കണം. മലയോരമേഖലകളിലും പ്രത്യേക ജാഗ്രത വേണം.
