ലോക ചാംപ്യന്മാരായ വനിതാ ടീമിന് കിട്ടുക 123 കോടി
മുംബൈ: ഐസിസി ഏകദിന ലോകകിരീടം നേടിയ ഇന്ത്യന് ടീമിനെ കാത്തിരിക്കുന്നത് വമ്പന് പാരിതോഷികങ്ങള്. ചാംപ്യന്മാരായ ഹര്മന്പ്രീത് കൗറിനും സംഘത്തിനും ഇന്ത്യന് ക്രിക്കറ്റ് കണ്ട്രോള് ബോര്ഡ് (ബിസിസിഐ) 51 കോടി രൂപയാണ് പാരിതോഷികം പ്രഖ്യാപിച്ചിരിക്കുന്നത്. ബിസിസിഐ സെക്രട്ടറി ദേവജിത് സൈകിയയാണ് അവാര്ഡ് തുക പ്രഖ്യാപിച്ചത്.
ലോക കിരീടത്തോടൊപ്പം ചാംപ്യന്മാരായ ഇന്ത്യന് ടീമിന് 39.78 കോടിയുടെ (4.48 മില്യണ് യുഎസ് ഡോളര്) പ്രൈസ് മണിയും ഐസിസി സമ്മാനിച്ചിരുന്നു. കായിക ചരിത്രത്തിലെ ഏറ്റവും ഉയര്ന്ന പ്രൈസ് മണിയാണ് ഇന്ത്യയ്ക്ക് ലഭിച്ചത്. കഴിഞ്ഞ പുരുഷ ലോകകപ്പിലെ വിജയിച്ച ടീമിന് 35.51 കോടി രൂപയാണ് നല്കിയത്.
വിജയികളായ ഇന്ത്യന് ടീമിന് ആകെ 123 കോടി രൂപയാണ് പാരിതോഷികമായി ലഭിക്കുക. 2022-ലെ ടൂര്ണമെന്റിന് നല്കിയ സമ്മാനത്തുകയേക്കാള് 297 ശതമാനത്തിന്റെ വര്ധനവാണ് ഇത്തവണ ഉണ്ടായിരിക്കുന്നത്. പുരുഷ-വനിതാ ടീമുകളുടെ സമ്മാനത്തുക തുല്യമായി നല്കാന് ഐസിസി തീരുമാനിച്ചതോടെയാണ് വന് വര്ധനയുണ്ടായത്.
ഫൈനലില് പരാജയപ്പെട്ട് രണ്ടാം സ്ഥാനക്കാരായ ദക്ഷിണാഫ്രിക്കയ്ക്ക് 19.88 കോടി രൂപയാണ് സമ്മാനത്തുകയായി ലഭിച്ചത്. സെമി ഫൈനലില് തോറ്റ ഓസ്ട്രേലിയയ്ക്കും ഇംഗ്ലണ്ടിനും 9.94 കോടി രൂപവീതവും ലഭിക്കും. 2017ലെ വനിതാ ഏകദിന ലോകകപ്പ് ഫൈനലില് ഇന്ത്യ ഇംഗ്ലണ്ടിനോട് വിജയത്തിന് അടുത്തെത്തി 9 റണ്സ് തോല്വി വഴങ്ങിയെങ്കിലും ടീം അംഗങ്ങള്ക്കും സപ്പോര്ട്ട് സ്റ്റാഫിനും ബിസിസിഐ 50 ലക്ഷം രൂപ പാരിതോഷികം പ്രഖ്യാപിച്ചിരുന്നു.
പൊന്തിളക്കമായി ഷഫാലി
മുംബൈ: പകരക്കാരിയായി ടീമിലെത്തി വിജയനായികയായി മടങ്ങിയിരിക്കുകയാണ് ഷഫാലി വര്മ. അവഗണനയുടെ കയ്പുനീര് താണ്ടിയാണ് ഷെഫാലി എന്ന 21 കാരി ലോകകിരീടമെന്ന മധുരം ഇന്ത്യയ്ക്ക് സമ്മാനിക്കുന്നതില് നിര്ണായക പങ്കാളിയായത്. ഫൈനലിലെ താരമായതും ഓള്റൗണ്ട് മികവ് പുറത്തെടുത്ത ഓപ്പണര് ഷഫാലി വര്മയാണ്.
51 കോടി പാരിതോഷികം പ്രഖ്യാപിച്ച് ബിസിസിഐ, ലോക ചാംപ്യന്മാരായ വനിതാ ടീമിന് കിട്ടുക 123 കോടി
ലോകകപ്പിനുള്ള ടീമിനെ പ്രഖ്യാപിച്ചപ്പോള് റിസര്വ് ടീമില് പോലും ഷഫാലിക്ക് ഇടംലഭിച്ചിരുന്നില്ല. മോശം ഫോമും ഫിറ്റ്നസ് പ്രശ്നങ്ങളുമാണ് ഷഫാലിക്ക് തിരിച്ചടിയായത്. ഷഫാലി ഇല്ലാതെയാണ് ഇന്ത്യന് ടീം ടൂര്ണമെന്റിന് ഇറങ്ങിയത്. പകരം ഓപ്പണറായി ഇറക്കിയ പ്രതീക റാവല് തിളങ്ങിയതോടെ ഷഫാലിയുടെ സാധ്യത അടഞ്ഞു. ആറ് ഇന്നിങ്സുകളില് നിന്നായി പ്രതിക റാവല് 308 റണ്സാണ് അടിച്ചുകൂട്ടിയത്.
