ചെന്നൈ: കരൂരില് 40 പോരുടെ മരണത്തിനിടയാക്കിയ ടിവികെ റാലിയില് പാര്ട്ടി അധ്യക്ഷനും നടനുമായ വിജയിനെതിരെ എഫ്ഐആറില് ഗുരുതര ആക്ഷേപം. പാര്ട്ടി നല്കിയ പരിധിയില് നിന്ന് മനഃപൂര്വം നാലു മണിക്കൂറോളം വൈകിയാണ് കരൂരിലേക്കുള്ള വിജയ് യുടെ വരവ്. അനുവാദമില്ലാതെ റോഡ് ഷോ നടത്തിയെന്നും എഫ്ഐആറില് പറയുന്നു. രാത്രി 9 മണിയോടെ രജിസ്റ്റര് ചെയ്ത എഫ്ഐആറിലാണ് വിജയിനെതിരെ ഗുരുതര ആരോപണങ്ങളുള്ളത്.
പാര്ട്ടിയുടെ ശക്തി പ്രകടനമാണ് വിജയ് കരൂരില് നടത്തിയത്. ആള്ക്കൂട്ടത്തെ ആകര്ഷിക്കുന്നതിനും, കൂടുതല് ആളെ എത്തിക്കുന്നതിനും വേണ്ടി വൈകുകയും റോഡ് ഷോ നടത്തുകയും ചെയ്തു. അനുമതിയില്ലാതെ പലയിടത്തും വിജയ് റോഡില് ഇറങ്ങി സ്വീകരണം ഏറ്റുവാങ്ങിയാണ് സ്ഥലത്തെത്തിയത്. ഡെപ്യൂട്ടി പൊലീസ് സൂപ്രണ്ട് തമിഴക വെട്രി കഴകം സംസ്ഥാന ഭാരവാഹികള്ക്ക് മുന്നറിയിപ്പ് നല്കിയെങ്കിലും അത് പാലിക്കപ്പെട്ടില്ല.
മണിക്കൂറുകളോളം കാത്തിരുന്ന ജനക്കൂട്ടം വിജയ് എത്തിയതോടെ അനിയന്ത്രിതമാകുകയായിരുന്നു. പരിപാടി വൈകരുതെന്ന നിര്ദേശിവും അനുമതിയില്ലാതെ വിജയ് റോഡില് ഇറങ്ങരുതെന്ന മുന്നറിയിപ്പും എല്ലാം അവഗണിച്ചതാണ് ഇത്രയേറെ മരണത്തിന് കാരണമായെന്നും എഫ്ഐആറില് പറയുന്നു. എന്നാല് എഫ്ഐആറില് വിജയിന്റെ പേര് പ്രതിപ്പട്ടികയില് ഉള്പ്പെടുത്തിയിട്ടില്ല. തിടുക്കപ്പെട്ട് വിജയിനെ പ്രതി ചേര്ക്കുന്നത് രാഷ്ട്രീയമായി തിരിച്ചടിയായേക്കുമെന്ന വിലയിരുത്തലിന്റെ അടിസ്ഥാനത്തിലാണ് എം കെ സ്റ്റാലിന് സര്ക്കാരുള്ളത്.
എന്നാല് ദുരന്തത്തില് സ്വതന്ത്രവും നിഷ്പക്ഷവുമായ അന്വേഷണം വേണമെന്നാവശ്യപ്പെട്ട് ടിവികെ മദ്രാസ് ഹൈക്കോടതിയില് ഹര്ജി നല്കിയിട്ടുണ്ട്. ഡിഎംകെ നേതാവും മന്ത്രിയുമായ സെന്തില് ബാലാജി അടക്കമുള്ളവര് ആസൂത്രണം ചെയ്തതാണ് ദുരന്തത്തിനിടയാക്കിയതെന്ന് കോടതിയില് നല്കിയ സത്യവാങ്മൂലത്തില് ടിവികെ ആരോപിക്കുന്നുണ്ട്. ദുരന്തത്തില് 41 പേരാണ് മരിച്ചത്. നിരവധി പേര് ഗുരുതരമായി പരിക്കേറ്റ് ചികിത്സയിലാണ്.
ടിവികെ ജനറല് സെക്രട്ടറി എന് ആനന്ദന്, ടിവികെ കരൂര് ജില്ലാ ഭാരവാഹികളായ മതിയഴകന് ഉള്പ്പെടെയുള്ളവര്ക്കെതിരെയാണ് നിലവില് പൊലീസ് കേസെടുത്തിട്ടുള്ളത്. വിജയ് ദുരന്തമുണ്ടായ കരൂരിലേക്ക് പോകാന് അനുമതി തേടിയെങ്കിലും പൊലീസ് നിഷേധിച്ചിട്ടുണ്ട്. ഇതേത്തുടര്ന്ന് കരൂരില് പോകാന് അനുമതി നല്കണമെന്ന് ആവശ്യപ്പെട്ട് വിജയ് ഹൈക്കോടതിയെ സമീപിച്ചിരിക്കുകയാണ്.
വിജയിക്കെതിരെ എഫ് ഐ ആറില് ഗുരുതരാക്ഷേപം
