തൃശൂര്‍: കൊടുങ്ങല്ലൂരില്‍ ലഹരിയടിച്ച് ഫിറ്റായി നടുറോഡില്‍ യുവാവിന്റെ മോട്ടോര്‍ ബൈക്ക് അഭ്യാസം. നിയമ ലംഘനത്തില്‍ പൊലീസ് പിടികൂടിയ യുവാവ് സ്റ്റേഷനിലെ ചില്ല് ഭിത്തിയും വാതിലും അടിച്ചു തകര്‍ത്ത് പരാക്രമം കാണിച്ചു. യുവാവിനെ റിമാന്റ് ചെയ്തു. ലോകമലേശ്വരം ഓളിപ്പറമ്പില്‍ ഷെബിന്‍ ഷാ (20) ആണ് സ്റ്റേഷനില്‍ അതിക്രമം നടത്തിയത്.
വ്യാഴാഴ്ച രാത്രിയിലായിരുന്നു കൊടുങ്ങല്ലൂര്‍ പൊലീസ് സ്റ്റേഷന്‍ പരിധിയില്‍ സംഭവംനടന്നത്. പടാകുളം പെട്രോള്‍ പമ്പിന് സമീപം അപകടകരമായ വിധത്തില്‍ മോട്ടോര്‍ സൈക്കിള്‍ ഓടിച്ച യുവാക്കളെ പൊലീസ് പട്രോള്‍ സംഘം തടയുകയായിരുന്നു. ബൈക്കിലുണ്ടായിരുന്ന രണ്ട് പേരില്‍ ഒരാള്‍ പൊലീസിനെ കണ്ട് ഓടി രക്ഷപ്പെട്ടു. തുടര്‍ന്ന് പൊലീസ് കസ്റ്റഡിയിലെടുത്ത ഷെബിന്‍ ഷാ സ്റ്റേഷനില്‍ അതിക്രമം നടത്തുകയായിരുന്നു.
പൊലീസ് സ്റ്റേഷന്‍ സബ്ബ് ഇന്‍സ്‌പെക്ടര്‍മാരായ കെ സാലിം, കശ്യപന്‍, ജോഷി, ഡ്രൈവര്‍ സിപിഒ അഖില്‍, ഹോം ഗാര്‍ഡ് ജോണ്‍സന്‍ എന്നിവരടങ്ങിയ സംഘമാണ് പ്രതിയെ പിടികൂടിയത്. ഷെബിന്‍ ഷായ്ക് കൊടുങ്ങല്ലൂര്‍ പൊലീസ് സ്റ്റേഷനില്‍ 2023 ലും 2025 ലും മയക്കുമരുന്ന് ഉപയോഗിച്ചതിന് , രണ്ട് കേസുകളുള്‍പ്പടെ നാല് കേസുകള്‍ നിലവിലുണ്ട്. ഓടിപ്പോയ പ്രതിയെക്കുറിച്ച് അന്വേഷിച്ചു വരുന്നതായും പൊലീസ് പറയുന്നു.
നടുറോഡില്‍ ബൈക്കില്‍ ലഹരിക്കൂത്ത്;
സ്‌റ്റേഷനിലും പരാക്രമം നടത്തി യുവാവ്
