കോട്ടയം: കുടുംബ വഴക്കിനെ തുടര്‍ന്ന് അമ്മായിയമ്മയെ മരുമകന്‍ പെട്രോളൊഴിച്ച് തീ കൊളുത്തികൊന്നു. പൊള്ളലേറ്റ് മരുമകനും ദാരുണാന്ത്യം.പാല അന്ത്യാളം സ്വദേശി നിര്‍മല, മരുമകന്‍ കരിങ്കുന്നം സ്വദേശി മനോജ് എന്നിവരാണ് മരിച്ചത്. ഭാര്യാമാതാവിന്റെ ശരീരത്തില്‍ പെട്രോള്‍ ഒഴിച്ച് തീകൊളുത്തുന്നതിനിടെ സ്വന്തം ശരീരത്തിലേക്ക് തീപടര്‍ന്നാണ് മനോജും മരിച്ചത്.ഇന്നലെ രാത്രി ഏഴരയോടെയാണ് സംഭവം. കോട്ടയം മെഡിക്കല്‍ കോളേജില്‍ ചികിതിസയിലിരിക്കെ ഇന്ന് രാവിലെയാണ് രണ്ട് പേരും മരിച്ചത്.
മരിച്ച മനോജും ഭാര്യാമാതാവായ നിര്‍മലയും തമ്മില്‍ ചില കുടുംബ പ്രശ്നങ്ങളുണ്ടായിരുന്നുവെന്നും മുമ്പും ഇയാള്‍ വീട്ടിലെത്തി അക്രമം നടത്തിയിട്ടുണ്ടെന്നും പോലീസ് അറിയിച്ചു. കുടുംബ വഴക്കിനെ തുടര്‍ന്നുണ്ടായ വൈരാഗ്യമാണ് പെട്രോളൊഴിച്ച് തീവെക്കുന്ന സ്ഥിതിയിലേക്ക് എത്തിയതെന്നും പോലീസ് പറയുന്നു. വീട്ടില്‍ മുമ്പും ഇവര്‍ തമ്മില്‍ പ്രശ്നങ്ങള്‍ ഉണ്ടായിരുന്നുവെന്ന് അയല്‍വാസികളും പറഞ്ഞു.
