കുവൈറ്റിലെ പ്രമുഖ സാംസ്‌കാരിക സംഘടനയായ കല(ആർട്ട്) കുവൈറ്റ് ശിശുദിനത്തോടനുബന്ധിച്ച് കുവൈറ്റിലെ ഇന്ത്യൻ സ്‌കൂൾ കുട്ടികൾക്കായി അമേരിക്കൻ ടൂറിസ്റ്ററുമായി സഹകരിച്ചു സംഘടിപ്പിക്കുന്ന ‘നിറം 2023′ ചിത്ര രചനാ മത്സരം നവമ്പർ 10 ന് വെള്ളിയാഴ്ച അബ്ബാസിയ ആസ്പയർ ഇന്ത്യൻ ഇന്റർനാഷണൽ സ്‌കൂളിൽ ഉച്ചയ്ക്ക് രണ്ടുമണിക്ക് ആരംഭിക്കും.
ശിശുദിനത്തിന്റെ ഭാഗമായി, പണ്ഡിറ്റ് ജവഹർലാൽ നെഹ്രുവിന്റെ 103-ാം ജന്മദിനത്തോടനുബന്ധിച്ചാണ് കുട്ടികൾക്കായി പരിപാടി സംഘടിപ്പിക്കുന്നത്. 2005 മുതൽ’നിറം’ എന്ന പേരിൽ നടത്തിവരുന്ന പരിപാടിയുടെ 19-ാം വാർഷികമാണ് ഈ വർഷം നടക്കുന്നത്.
ഡ്രോയിംഗിലും പെയിന്റിംഗിലുമായി നാല് ഗ്രൂപ്പുകളിലായിരിക്കും മത്സരം നടക്കുക.
ഗ്രൂപ്പ് എ – എൽ കെ ജി മുതൽ ഒന്നാം ക്ലാസ് വരെ,
ഗ്രൂപ്പ് ബി – രണ്ടാം ക്ലാസ് മുതൽ നാല് വരെ.
ഗ്രൂപ്പ് സി – അഞ്ചാം ക്ലാസ് മുതൽ ഏഴ് വരെ,
ഗ്രൂപ്പ് ഡി – എട്ടാം ക്ലാസ് മുതൽ പന്ത്രണ്ടാം ക്ലാസ് വരെ.
ആദ്യത്തെ രണ്ടു ഗ്രൂപ്പുകൾക്ക് ക്രയോൺസും കളർപെൻസിലും ഗ്രൂപ്പ് സി, ഡി എന്നിവർക്ക് വാട്ടർ കളറുകളും ഉപയോഗിക്കാം. ഇത് മത്സരാർത്ഥികൾ കൊണ്ടുവരേണ്ടതാണ്. ഡ്രോയിംഗ് ഷീറ്റ് സംഘാടകർ നൽകും. ചിത്രരചന കൂടാതെ, ഏഴാം ക്ലാസ് മുതൽ പന്ത്രണ്ടാം ക്ലാസ് വരെയുള്ള കുട്ടികൾക്കായി ക്ലേ സ്‌കൾപ്ചർ മത്സരവും, രക്ഷിതാക്കൾക്കും സന്ദർശകർക്കും പങ്കെടുക്കാവുന്ന ഓപ്പൺ ക്യാൻവാസ് പെയിന്റിംഗും ഒരുക്കിയിട്ടുണ്ട്. ഓപ്പൺ ക്യാൻവാസ് മത്സരത്തിൽ പങ്കെടുക്കുന്നവർക്കും സമ്മാനം നേടാൻ അവസരം ഉണ്ടായിരിക്കുന്നതാണ്.
ഒന്നാം സ്ഥാനം നേടുന്നവർക്ക് സ്വർണ നാണയമാണ് സമ്മാനം രണ്ടും മൂന്നും സമ്മാനങ്ങൾക്കുപുറമെ 75 പേർക്ക് മെറിറ്റ് പ്രൈസും 10 ശതമാനം പേർക്ക് പ്രോത്സാഹന സമ്മാനവും നൽകുന്നതാണ്. ഓൺലൈൻ രജിസ്‌ട്രേഷൻ നവംബർ 7-ാം തിയ്യതിവരെ .www.kalakuwait.net എന്ന വെബ്‌സൈറ്റിലൂടെ ചെയ്യാവുന്നതാണ്. ഓൺസ്‌പോട്ട് രജിസ്‌ട്രേഷനും ഉണ്ടായിരിക്കും കൂടുതൽ വിവരങ്ങൾക്ക് [email protected] എന്ന ഇ-മെയിൽ വഴിയും കൂടാതെ 97959072, 66015466, 66114364 എന്നീ നമ്പറുകൾ വഴിയും ബന്ധപ്പെടാവുന്നതാണ്. കുവൈറ്റിലെ പ്രഗത്ഭ ആർട്ടിസ്റ്റുകൾ മത്സരം നിയന്ത്രിക്കും.
വാർത്താസമ്മേളനത്തിൽ കല(ആർട്ട്) കുവൈറ്റ് പ്രസിഡന്റ് ജെയ്‌സൺ ജോസഫ്, ജനറൽ സെക്രട്ടറി രാകേഷ് പി. ഡി. ട്രഷറർ അഷ്റഫ് വിതുര, മീഡിയ കൺവീനർ മുകേഷ് വി പി, അമേരിക്കൻ ടൂറിസ്റ്റർ മാർക്കറ്റിംഗ് മാനേജർ നൗഫൽ, രജിസ്‌ട്രേഷൻ കൺവീനർ അജിത്, സുനിൽ എന്നിവർ പങ്കെടുത്തു.
