കുവൈത്ത് സിറ്റി: കേന്ദ്ര സര്‍ക്കാറിന്റെ ഒമ്പത് വര്‍ഷത്തെ ഭരണ പരാജയത്തില്‍ നിന്ന് ജനശ്രദ്ധ തിരിച്ചുവിടാനാണ് ഏക സിവില്‍ കോഡ് വിവാദത്തിലൂടെ ശ്രമിക്കുന്നതെന്ന് പി.വി അബ്ദുല്‍ വഹാബ് ബേപ്പൂര്‍. ഇന്ത്യന്‍ ഇസ്‌ലാഹി സെന്റര്‍ ഫര്‍വാനിയ പീസ് ഓഡിറ്റോറിയത്തില്‍ സംഘടിപ്പിച്ച ബസ്വീറ സംഗമത്തില്‍ ഏക സിവില്‍ കോഡിനെ സംബന്ധിച്ച് സംസാരിക്കുകയായിരുന്നു അദ്ദേഹം.
മണിപ്പൂരിലെ ആഭ്യന്തര കലാപങ്ങള്‍ മാസങ്ങളായിട്ടും നിയന്ത്രിക്കാന്‍ സാധിക്കാത്ത ബി.ജെ.പി സര്‍ക്കാര്‍ തികഞ്ഞ പരാജയമാണ്. ആസൂത്രിതമായ വിദ്വേഷ പ്രചരണങ്ങളിലൂടെ രാജ്യത്തെ വര്‍ഗ്ഗീയമായി വിഭജിച്ചതിന്റെ പൂര്‍ണ്ണ ഉത്തരവാദിത്തം നരേന്ദ്ര മോദി സര്‍ക്കാരിനാണ്. തൊഴിലില്ലായ്മയും വിലക്കയറ്റവും കൊണ്ട് ഇന്ത്യയിലെ സാധാരണക്കാര്‍ ദുരിതം പേറുകയാണ്. ഇത്തരത്തിലുള്ള അടിസ്ഥാന വിഷയങ്ങളില്‍ നിന്ന് ജനങ്ങളുടെ ശ്രദ്ധ തിരിച്ച് വിവാദ വിഷയങ്ങള്‍ ചര്‍ച്ചയാക്കി സാമുദായിക ധ്രുവീകരണത്തിലൂടെ അടുത്ത തെരഞ്ഞെടുപ്പില്‍ നേട്ടമുണ്ടാക്കുവാനാണ് കേന്ദ്രസര്‍ക്കാര്‍ ശ്രമിക്കുന്നതെന്ന് അബ്ദുല്‍ വഹാബ് വിശദീകരിച്ചു.
പറക്കാന്‍ സഹായകമായ ശരീരഘടന തൊട്ട്, ഭൂഖണ്ഡങ്ങള്‍ താണ്ടി ദേശാന്തരഗമനം നടത്തുന്ന പറവകളെ, ദിശയും മാര്‍ഗ്ഗവും തെറ്റാതെ മടങ്ങിയെത്താന്‍ സഹായിക്കുന്ന ജനിതക രഹസ്യം വരെ, സവിസ്തരം വിശുദ്ധ ഖുര്‍ആനില്‍ വിശകലനം ചെയ്യുന്ന രചനകള്‍ പക്ഷിശാസ്ത്ര പഠനത്തിനു വളരെ സഹായകമാണെന്ന് തദബ്ബുറുല്‍ ഖുര്‍ആനില്‍ ക്ലാസെടുത്ത സൈദ് മുഹമ്മദ് റഫീഖ് വിശദീകരിച്ചു.
ആരിഫ് പുളിക്കല്‍ അധ്യക്ഷത വഹിച്ചു. ജനറല്‍ സെക്രട്ടറി അബ്ദുല്‍ അസീസ് സലഫി, മുഹമ്മദ് ശാനിബ്, മുഹമ്മദ് ആമിര്‍ യു.പി എന്നിവര്‍ സംസാരിച്ചു. വിജയികള്‍ക്ക് സമ്മാനവും വിതരണം ചെയ്തു.
