ട്വിറ്ററിന്റെ സിഇഒ ആയി ചുമതലയേറ്റ ലിൻഡ യക്കാരിനോ ഗൂഗിൾ ക്ലൗഡിന് നൽകേണ്ടിയിരുന്ന പണം മുഴുവൻ കാലാവധി തീരുന്നതിന് മുമ്പ് നൽകി. ബില്ലുകൾ അടക്കാത്തതിനെ തുടർന്ന് ഇരു സ്ഥാപനങ്ങളും തമ്മിലുള്ള ബന്ധം വഷളായിരുന്നു. യക്കാരിനോയുടെ ഇടപെടലിലാണ് ബന്ധം പരിഹരിക്കപ്പെട്ടത് എന്നും ഗൂഗിൾ ക്ലൗഡ് സേവനങ്ങൾക്ക് ട്വിറ്റർ ഇപ്പോൾ പണം നൽകുന്നുണ്ടെന്നും വാൾ സ്ട്രീറ്റ് ജേണൽ റിപ്പോർട്ട് ചെയ്തു.
ട്വിറ്റർ ബില്ലുകൾ അടയ്ക്കുന്നത് പുനരാരംഭിച്ചതിന് ശേഷം രണ്ട് കമ്പനികളും ഇപ്പോൾ ബന്ധം വിശാലമാക്കുന്നതിനുള്ള ശ്രമങ്ങളിലാണ്. ഗൂഗിൾ ട്വിറ്റർ എപിഐ വീണ്ടും ഉപയോഗിക്കുന്നതിനെ കുറിച്ചും ട്വിറ്ററിൽ പരസ്യങ്ങൾ വാങ്ങുന്നതിനെ കുറിച്ചുമെല്ലാം ചർ‍ച്ച നടത്തുന്നുണ്ടെന്നാണ് വിവരം.
ഈ മാസം ആദ്യം, എലോൺ മസ്‌കിന്റെ നേതൃത്വത്തിലുള്ള ട്വിറ്റർ ഗൂഗിൾ ക്ലൗഡ് ബില്ലുകൾ അടയ്ക്കാൻ വിസമ്മതിച്ചതായി റിപ്പോർട്ടുകൾ പുറത്തുവന്നിരുന്നു. ഈ മാസം 30 ആയിരുന്നു അവസാന തീയ്യതി. പണം നൽകിയില്ലെങ്കിൽ ക്ലൗഡ് ബന്ധം വിച്ഛേദിക്കുമെന്ന മുന്നറിയിപ്പും ഗൂഗിൾ നൽകിയിരുന്നു.
