ന്യൂഡല്ഹി: ആരായാലും റെയില്വേ വികസനത്തിന് മുന്നോട്ട്് വന്നാല് അവരെ റെയില്വേ മന്ത്രാലയം സ്വാഗതം ചെയ്യുമെന്ന് കേന്ദ്ര റെയില്വേ മന്ത്രി അശ്വിനി വൈഷ്ണവ്. ഇ ശ്രീധരന് ഹൈ സ്പീഡ് റെയിലിനായി മലപ്പുറത്ത് ഓഫീസ് തുറന്നതും, പദ്ധതിയുമായി മുന്നോട്ടു പോകുന്നതും കേന്ദ്രമന്ത്രിയുടെ അറിവോടെയാണോ എന്ന രാജ്യസഭയിലെ ഹാരിസ് ബീരാന്റെ ചോദ്യത്തിന് മറുപടി നല്കുകയായിരുന്നു മന്ത്രി.
വലിയ പാരിസ്ഥിതികാഘാതം ഉണ്ടാക്കുന്നതിനാല് സില്വര്ലൈന് പദ്ധതി പ്രായോഗികമല്ലെന്ന് മന്ത്രി അശ്വിനിവൈഷ്ണവ്. സംസ്ഥാനത്തിന് താല്പ്പര്യമുണ്ടെങ്കില് അതിവേഗ റെയില് പരിഗണിക്കാമെന്നും കേന്ദ്രമന്ത്രി അറിയിച്ചു. സംസ്ഥാന സര്ക്കാര് റെയില്വേ പദ്ധതികള് നടപ്പിലാക്കുന്ന കാര്യത്തില് തീരെ സഹകരിക്കുന്നില്ലെന്ന് കേന്ദ്രമന്ത്രി കുറ്റപ്പെടുത്തി. ശബരി പാതക്ക് 14 ശതമാനം ഭൂമി മാത്രമാണ് സംസ്ഥാനം ഏറ്റെടുത്ത് നല്കിയത്. തിരഞ്ഞെടുപ്പ് മുന്നില് കണ്ടാണ് ഇപ്പോള് സംസ്ഥാന സര്ക്കാര് ശബരി പാതയുമായി മുന്നോട്ട് വന്നതെന്നും അദ്ദേഹം പറഞ്ഞു.
അതിവേഗ റെയില് പദ്ധതിക്കായി ഇ ശ്രീധരന് ഓഫീസ് തുറന്നതിനെ കേന്ദ്രമന്ത്രി അശ്വിനി വൈഷ്ണവ് സ്വാഗതം ചെയ്തു. റെയില്വേയെക്കുറിച്ചും സാങ്കേതിക വിഷയത്തിലും ജ്ഞാനമുള്ള വ്യക്തിയാണ് ഇ ശ്രീധരന്. ശ്രീധരന് എന്നല്ല ആരായാലും റെയില്വേ വികസനത്തിന് മുന്നിലേക്ക് വന്നാല് അവരെ റെയില്വേ മന്ത്രാലയം സ്വാഗതം ചെയ്യുന്നു. ശ്രീധരന്റെ ഇത്തരത്തിലുള്ള നടപടികളെ സര്ക്കാര് സ്വാഗതം ചെയ്യുകയാണെന്നും അശ്വിനി വൈഷ്ണവ് പറഞ്ഞു.
