മലപ്പുറം: കെ. സുധാകരന്റെ ആര്‍.എസ്.എസ് പ്രസ്താവന ലീഗ് യോഗം ചര്‍ച്ച ചെയ്‌തെന്ന് മുസ്‌ലിം ലീഗ് ജനറല്‍ സെക്രട്ടറി പി.എം.എ സലാം. കെ.സുധാകരന്‍ സാദിഖലി തങ്ങളുമായി സംസാരിച്ചിരുന്നു. കോണ്‍ഗ്രസിന്റെ മറുപടിയില്‍ തൃപ്തിയുണ്ടെന്നും പി.എം.എ സലാം പറഞ്ഞു. കൂടാതെ കോണ്‍ഗ്രസ് നേതാക്കളുമായി സംസാരിച്ചു.എന്നാല്‍, കെ.പി.സി.സി അധ്യക്ഷനെ മാറ്റണമെന്ന് ലീഗ് ആവശ്യപ്പെട്ടിട്ടില്ല. ലീഗ് യു.ഡി.എഫില്‍ തന്നെ തുടരുമെന്നും പി.എം.എ സലാം പറഞ്ഞു.
അതേസമയം സംസ്ഥാന കോണ്‍ഗ്രസില്‍ തനിക്കെതിരായ പടയൊരുക്കം ചൂണ്ടിക്കാട്ടി കെ.പി.സി.സി അധ്യക്ഷ പദം ഒഴിയാനുള്ള സന്നദ്ധത രാഹുല്‍ ഗാന്ധിയെ സുധാകരന്‍ അറിയിച്ചതായി വാര്‍ത്തകള്‍ പുറത്തുവന്നിരുന്നു. എന്നാല്‍, സുധാകരന്‍ ഇത് നിഷേധിച്ചു. എന്റെ പേരില്‍ ഇപ്പോള്‍ പുറത്തുവരുന്ന കത്തിലെ കാര്യങ്ങള്‍ മാധ്യമങ്ങളുടെ ഭാവനാ സൃഷ്ടിയാണ്. ഇത്തരം ഒരു കത്ത് ഏത് കേന്ദ്രത്തില്‍ നിന്നാണ് വന്നതെന്ന് അന്വേഷിക്കും. അവാസ്തവമായ കാര്യങ്ങളാണ് മാധ്യമങ്ങളിലൂടെ കുറച്ച് ദിവസങ്ങളായി തനിക്കെതിരെ പുറത്ത് വരുന്നതെന്നും അദ്ദേഹം വാര്‍ത്താക്കുറിപ്പില്‍ പറഞ്ഞു.
