ലഡാക്കില്‍ സൈനിക പരിശീലനത്തിനിടെ അപകടം; അഞ്ച് സൈനികര്‍ക്ക് വീരമൃത്യു
ലഡാക്ക്: ലഡാക്കില്‍ സൈനിക പരിശീലനത്തിനിടെയുണ്ടായ അപകടത്തില്‍ അഞ്ച് സൈനികര്‍ക്ക് വീരമൃത്യു. ജെ.സി ഓഫീസറും നാല് ജവാന്മാരുമാരാണ് മരിച്ചത്. ടാങ്കുകള്‍ പുഴ മുറിച്ചു കടക്കവെ ജലനിരപ്പ് ഉയര്‍ന്നാണ് അപകടമുണ്ടായത്. അതിവേഗം സഞ്ചരിക്കുന്ന ഠ 72 ടാങ്ക് പരിശീലനത്തിലാണ് അപകടം.
മന്ദിര്‍ മോറിന് സമീപം പുലര്‍ച്ചെ ഒരു മണിയോടെയാണ് സംഭവം. അഞ്ച് സൈനികരുമായി ടി-72 ടാങ്ക് നദി മുറിച്ചുകടക്കുന്നതിനിടെ പെട്ടെന്ന് ജലനിരപ്പ് ഉയര്‍ന്നതാണ് അപകടത്തിന് കാരണമായത്. ”സംഭവസമയത്ത് ഒരു ജെസിഒയും 4 ജവാന്‍മാരും ഉള്‍പ്പെടെ അഞ്ച് സൈനികരാണ് ടാങ്കിലുണ്ടായിരുന്നത്. മറ്റുള്ളവര്‍ക്കായി തിരച്ചില്‍ തുടരുന്നതിനിടെ ഒരാളെ കണ്ടെത്തി” പ്രതിരോധ ഉദ്യോഗസ്ഥര്‍ എഎന്‍ഐയോട് പറഞ്ഞു.
ലഡാക്കില്‍ സൈനികര്‍ മുങ്ങിമരിക്കാനിടയായത് നിര്‍ഭാഗ്യകരമെന്ന് പ്രതിരോധമന്ത്രി രാജ്‌നാഥ് സിങ് പറഞ്ഞു. വീരമൃത്യുവരിച്ച സൈനികരുടെ സേവനം രാജ്യം മറക്കില്ലെന്നും അദ്ദേഹം എക്‌സില്‍ കുറിച്ചു.
