ഇംഫാൽ: മണിപ്പൂരിൽ പോലീസ് കമാൻഡോകളുടെ വേഷത്തിൽ കലാപകാരികൾ എത്താൻ സാധ്യതയുണ്ടെന്ന് മുന്നറിയിപ്പുമായി പോലീസ്. കലാപത്തിനിടെ മോഷ്ടിക്കപ്പെട്ട യൂണിഫോമുകളാണ് കലാപകാരികൾ ദുരുപയോഗം ചെയ്യുന്നത്.
മണിപ്പൂർ പൊലീസ് കമാൻഡോകളുടെ കറുത്ത യൂണിഫോം അണിഞ്ഞ് ഒരു സംഘം അക്രമകാരികൾ നീങ്ങുന്നതിന്റെ വിഡിയോ കഴിഞ്ഞ ദിവസങ്ങളിൽ പുറത്തു വന്നിരുന്നു. ഇത് മോഷ്ടിക്കപ്പെട്ടവയാണെന്ന് തിരിച്ചറിഞ്ഞിട്ടുണ്ട്. കമാൻഡോ യൂണിഫോം ദുരുപയോഗം ചെയ്യരുതെന്ന് പൊലീസ് ആവശ്യപ്പെട്ടിട്ടുണ്ട്.
പോലീസ് ജാഗ്രതാ നിർദേശം പുറപ്പെടുവിച്ച സാഹചര്യത്തിൽ സൈനിക വാഹനങ്ങൾ അടക്കം പരിശോധിക്കുന്നതിൽ തെറ്റില്ലെന്നും ഉദ്യോഗസ്ഥരുടെ തിരിച്ചറിയൽ കാർഡുകൾ പരിശോധിക്കണമെന്നും പൊലീസ് മേധാവി നിർദേശം നൽകിയിരിക്കുകയാണ്.
