തിരുവനന്തപുരം: ശബരിമല സ്വര്ണക്കൊള്ള കേസില് ദേവസ്വം ബോര്ഡ് മുന് പ്രസിഡന്റ് എ പത്മകുമാര് അറസ്റ്റില്. എ പത്മകുമാര് 2019ല് ദേവസ്വം ബോര്ഡ് പ്രസിഡന്റായിരുന്നു. തിരുവനന്തപുരത്തെ രഹസ്യ കേന്ദ്രത്തില് വെച്ച് മണിക്കൂറുകള് നീണ്ട ചോദ്യം ചെയ്യലിന് സ്ഷമാണ് എസ്ഐടി പത്മകുമാറിന്റെ അറസ്റ്റ് ചെയ്തത്. സിപിഎം പത്തനംതിട്ട ജില്ലാ കമ്മിറ്റി അംഗമാണ് പത്മകുമാര്. ശബരിമല ശ്രീകോവിലിന് മുന്നിലെ കട്ടിളപ്പടിയിലെ സ്വര്ണം കവര്ന്ന കേസുമായി ബന്ധപ്പെട്ടാണ് അറസ്റ്റ്. കൊല്ലം വിജി കോടതിയില് ഇന്ന് തന്നെ പത്മകുമാറിനെ ഹാജരാക്കും.
ദേവസ്വം ബോര്ഡിന്റെ അറിവോടെയാണ് തട്ടിപ്പ് നടന്നതെന്നാണ് എസ്ഐടിയുടെ പ്രാഥമിക കണ്ടെത്തല്. കേസില് എട്ടാം പ്രതിയായി എ പത്മകുമാര് അധ്യക്ഷനായ 2019ലെ ബോര്ഡിനെ പ്രതി ചേര്ത്തിരുന്നു. ബോര്ഡിന്റെ അറിവോടെയാണ് പാളികള് ഇളക്കിയെടുത്ത് പോറ്റിക്ക് കൊടുത്തത് എന്നാണ് എസ്ഐടി തയ്യാറാക്കിയ എഫ് ഐ ആര്. അറസ്റ്റിലായ മുരാരി ബാബു ഉള്പ്പെടെ ഉദ്യോഗസ്ഥരും ബോര്ഡ് തീരുമാനം എന്നാണ് മൊഴി നല്കിയത്. 2019 ല് പത്മകുമാറിന്റെ സഹായികളായി നിന്ന മറ്റു ജീവനക്കാരുടെയും മൊഴി രേഖപ്പെടുത്തിയിരുന്നു. പോറ്റിക്ക് ശബരിമലയില് പത്മകുമാര് സര്വ്വ സ്വാതന്ത്ര്യം കൊടുത്തിരുന്നുവെന്നാണ് അന്വേഷണ സംഘത്തിന്റെ കണ്ടെത്തല്. ആദ്യം അന്വേഷിച്ച ദേവസ്വം വിജിലന്സും ബോര്ഡിന്റെ പങ്ക് കണ്ടെത്തിയിരുന്നു.
ശബരിമല സ്വര്ണക്കൊള്ള കേസില് മുന് ദേവസ്വം കമ്മീഷണര് എന് വാസുവിനെ പ്രത്യേക അന്വേഷണ സംഘത്തിന്റെ കസ്റ്റഡിയില് വിട്ടു. രാവിലെ 11 മണിയ്ക്ക് കസ്റ്റഡി അപേക്ഷ പരിഗണിച്ച കൊല്ലം വിജിലന്സ് കോടതി വൈകിട്ട് 4 മണി വരെ വാസുവിനെ കസ്റ്റഡിയില് നല്കുകയായിരുന്നു. കൊട്ടാരക്കര സബ് ജയിലില് കഴിഞ്ഞ വാസുവിനെ വന് പൊലീസ് സുരക്ഷയിലാണ് കോടതിയില് എത്തിച്ചത്. കസ്റ്റഡിയില് വാങ്ങിയ വാസുവുമായി പോയ പൊലീസ് വാഹനത്തിന് മുന്നില് ബിജെപി പ്രവര്ത്തകര് പ്രതിഷേധിച്ചു.മുന് കമ്മീഷണറും പ്രസിഡന്റുമായ എന്.വാസു സ്വര്ണപാളി കേസില് മൂന്നാം പ്രതിയാണ്. സ്വര്ണ്ണക്കൊള്ളയില് പ്രതിയായ മുന് അഡ്മിനിസ്ട്രേറ്റീവ് ഓഫീസര് മുരാരി ബാബുവിന്റെ ജാമ്യാപേക്ഷയിലും ഇന്ന് വാദം തുടരും. ദ്വാരപാലക കേസിലും കട്ടിളപ്പാളി കേസിലും മുരാരി ബാബു പ്രതിയാണ്.
ശബരിമല സ്വര്ണക്കൊള്ള : ദേവസ്വം ബോര്ഡ് മുന് പ്രസിഡന്റ് എ പത്മകുമാര് അറസ്റ്റില്
