തിരുവനന്തപുരം: കേന്ദ്ര വിദ്യാഭ്യാസ നയത്തിന്റെ ഭാഗമായുള്ള പിഎം ശ്രീ പദ്ധതിയില് ഭാഗമായത് കുട്ടികള്ക്ക് അവകാശപ്പെട്ട ഒരു രൂപ പോലും നഷ്ടപ്പെടുത്താന് സര്ക്കാര് തയ്യാറല്ലാത്തുകൊണ്ടാണ്. ഫണ്ട് ലഭ്യമാക്കാന് വേണ്ടിയുള്ള തന്ത്രപരമായ നീക്കമാണെന്ന് പൊതു വിദ്യാഭ്യാസ മന്ത്രി വി ശിവന്കുട്ടി. പദ്ധതിയില് ഒപ്പിടാത്തതിന്റെ പേരില് കേന്ദ്ര സര്ക്കാര് സംസ്ഥാനത്തെ വിദ്യാഭ്യാസ മേഖലയ്ക്ക് ആവശ്യമായ ഫണ്ട് തടഞ്ഞുവച്ചു. കേന്ദ്രത്തിന്റെ രാഷ്ട്രീയ സമ്മര്ദത്തിന് വഴങ്ങില്ല. രാഷ്ട്രീയ സമ്മര്ദത്തിന്റെ പേരില് കുട്ടികളുടെ ഭാവി പന്താടാന് സര്ക്കാര് ഒരുക്കമല്ലെന്നും വി ശിവന്കുട്ടി പ്രതികരിച്ചു. സംസ്ഥാനത്തിന് അര്ഹമായ കോടിക്കണക്കിന് രൂപയാണ് കേന്ദ്രം തടഞ്ഞുവച്ചത്.കുട്ടികള്ക്ക് അവകാശപ്പെട്ട ഒരു രൂപ പോലും നഷ്ടപ്പെടുത്താന് സര്ക്കാര് തയ്യാറല്ല. ഈ ഫണ്ട് ഏതെങ്കിലും പാര്ട്ടിയുടെ ഔദാര്യമല്ല, മറിച്ച് കേരളത്തിലെ ജനങ്ങളുടെ നികുതിപ്പണത്തില് നിന്നുള്ള, നമ്മുടെ കുട്ടികള്ക്ക് അവകാശപ്പെട്ട വിഹിതമാണ്. ആ അവകാശം നേടിയെടുക്കുക എന്നത് ഒരു ജനകീയ സര്ക്കാരിന്റെ ഉത്തരവാദിത്വമാണെന്നും വി ശിവന്കുട്ടി വിശദീകരിച്ചു.ഇതിന്റെ പേരില് കേരളത്തിന്റെ പൊതുവിദ്യാഭ്യാസ രംഗത്തെ തകര്ക്കാന് അനുവദിക്കില്ലെന്നും മന്ത്രി വാര്ത്താസമ്മേളനത്തില് അറിയിച്ചു.
2023-24 വര്ഷത്തില് 188.58 കോടിയും 2024-25 വര്ഷത്തില് 518.54 കോടിയും 2025-26 കാലത്ത് 456.01 കോടി രൂപയുമായിരുന്നു കേരളത്തിന് ലഭിക്കേണ്ടിയിരുന്നത്. ഇക്കാലയളവില് ആകെ 1158.13 കോടി രൂപ കേരളത്തിന് നഷ്ടമായെന്നും മന്ത്രി വിശദീകരിച്ചു. പിഎം ശ്രീ പദ്ധതി 2027 മാര്ച്ചില് അവസാനിക്കും. ഇക്കാലയളവിലേക്കായി 1476. 13 കോടി സംസ്ഥാനത്തിന് ലഭിക്കും. കരാരില് ഒപ്പുവച്ചതോടെ സമഗ്ര ശിക്ഷ അഭിയാന് കേരളയ്ക്ക് 973 കോടി ഉടന് ലഭിക്കുമെന്നും മന്ത്രി വിശദീകരിച്ചു. പിഎം ശ്രീയുടെ ഭാഗമായതോടെ ദേശീയ വിദ്യാഭ്യാസ നയം 2020 അംഗീകരിച്ചു എന്ന തരത്തിലുള്ള വാദം സാങ്കേതികം മാത്രമാണെന്നും മന്ത്രി അറിയിച്ചു. സ്കൂളില് മോദിയുടെ പേരും പടവും വയ്ക്കില്ലെന്നും മന്ത്രി കൂട്ടിച്ചേര്ത്തു.
അഞ്ച് ലക്ഷത്തി അറുപത്തിയൊന്നായിരം പട്ടികജാതി/പട്ടികവര്ഗ്ഗ കുട്ടികള്ക്കുള്ള ആനുകൂല്യങ്ങള്, ഒരു ലക്ഷത്തി എണ്ണായിരം ഭിന്നശേഷി കുട്ടികള്ക്കുള്ള പ്രത്യേക പിന്തുണ, തെറാപ്പി സൗകര്യങ്ങള്, സഹായ ഉപകരണങ്ങള് എന്നിവയേയും ബാധിക്കും.വിദ്യാഭ്യാസ അവകാശ നിയമം അനുസരിച്ചുള്ള സൗജന്യ യൂണിഫോം, പാഠപുസ്തകം, പെണ്കുട്ടികള്ക്കുള്ള അലവന്സുകള്, പ്രീ-പ്രൈമറി വിദ്യാഭ്യാസം, അധ്യാപക പരിശീലനം, പരീക്ഷാ നടത്തിപ്പ് തുടങ്ങി പൊതുവിദ്യാഭ്യാസത്തിന്റെ നട്ടെല്ലായ പ്രവര്ത്തനങ്ങളെയാണ് ഈ ഫണ്ടിന്റെ അഭാവം തകര്ക്കുന്നത്.
പി എം ശ്രീയില് ഒപ്പുവെച്ചത് സര്ക്കാര് തന്ത്രം;മന്ത്രി വി.ശിവന്കുട്ടി
