തിരുവനന്തപുരം: നാവായിക്കുളം കിഴക്കനേല ഗവണ്മെന്റ് എല്.പി സ്കൂളില് ഉച്ച ഭക്ഷണം കഴിച്ച 25ഓളം കുട്ടികള്ക്ക് ഭക്ഷ്യവിഷബാധയേറ്റു. ഇവരെ പാരിപ്പള്ളി സര്ക്കാര് ആശുപത്രിയില് ചികിത്സയ്ക്കായി പ്രവേശിപ്പിച്ചു. കഴിഞ്ഞ ദിവസമായിരുന്നു സംഭവം. സ്കൂളിലെ ഉച്ചഭക്ഷണത്തിനു ശേഷമാണ് അസ്വസ്ഥത ഉണ്ടായത്. ചോറിനോടൊപ്പം കുട്ടികള്ക്ക് ചിക്കന് കറിയും വിളമ്പിയിരുന്നു. ഇതില് നിന്നാകാം ഭക്ഷ്യ വിഷബാധയേറ്റതെന്നാണ് പ്രാഥമിക നിഗമനം. രണ്ടു കുട്ടികള് ആശുപത്രിയില് ചികിത്സയില് കഴിയുകയാണ്. നാവായിക്കുളം വെട്ടിയറ സ്വദേശിയായ എട്ട് വയസ്സുള്ള ചിരഞ്ജീവി, കിഴക്കനേല സ്വദേശി ആറ് വയസ്സുള്ള വജസ്സ് വിനോദ് എന്നിവരാണ് പാരിപ്പള്ളി മെഡിക്കല് കോളേജില് 8-ാം വാര്ഡില് ചികിത്സയില് കഴിയുന്നത്.
ചികിത്സ തേടിയ ശേഷം വീട്ടിലേക്ക് മാറ്റിയ കുട്ടികള് നിരീക്ഷണത്തിലാണ്. സംഭവത്തെക്കുറിച്ച് സ്കൂള് അധികൃതര് തദ്ദേശ സ്ഥാപനത്തെയോ ബന്ധപ്പെട്ട അധികൃതരെയോ അറിയിച്ചില്ലെന്ന വിമര്ശനവും ഉയരുന്നുണ്ട്.
