കക്കോടി: പരിശുദ്ധമായ റംസാന്‍ ദാനധര്‍മങ്ങള്‍ക്ക് ഏറെ മഹത്വവും പ്രതിഫലവുമുണ്ടാകുന്ന മാസമാണെന്നും ആത്മാര്‍ത്ഥമായ ദാന ധര്‍മങ്ങള്‍ അല്ലാഹു സ്വീകരിച്ചാല്‍ നിശ്ചയിച്ച ആയുസില്‍ പോലും മാറ്റമുണ്ടാകുമെന്നും അതാണ് ധര്‍മത്തിന്റെ പ്രാധാന്യമെന്നും മുസ്ലിം ലീഗ് സംസ്ഥാന വൈസ് പ്രസിഡന്റ് എം.സി മായിന്‍ ഹാജി പറഞ്ഞു.കക്കോടി മേഖല ശിഹാബ് തങ്ങള്‍ റിലീഫ് കമ്മിറ്റി സഫ മക്ക മെഡിക്കല്‍ ഗ്രൂപ്പിന്റെ സഹകരണത്തോടെ സംഘടിപ്പിച്ച മൂന്നാം ഘട്ട റമസാന്‍ ഭക്ഷണ സാധന കിറ്റ് വിതരണം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. കാരുണ്യത്തിന്റെ കേദാരമായിരുന്നു മഹാനായ ശിഹാബ് തങ്ങളെന്നും അദ്ദേഹം കൂട്ടിച്ചേര്‍ത്തു. കമ്മിറ്റി ചെയര്‍മാന്‍ കെ.പി മജീദ് അധ്യക്ഷനായി. മഹല്ല് ഖത്തീബ് അബ്ദുറഹിമാന്‍ ദാരിമി പ്രാര്‍ത്ഥന നടത്തി.
എം.ഇ.എസ് ജില്ലാ പ്രസിഡന്റ് പി.കെ അബ്ദുല്‍ ലത്തീഫ് മുഖ്യ പ്രഭാഷണം നിര്‍വ്വഹിച്ചു. കണ്‍വീനര്‍ എ.കെ ജാബിര്‍ കക്കോടി, കെ.കെ ഉബൈസ്, റീജ കക്കോടി സംസാരിച്ചു. നിര്‍ദ്ധനര്‍ക്കുള്ള സാമ്പത്തിക സഹായ വിതരണവും നടന്നു.
