പ്രവാസി കുടുംബങ്ങള്‍ക്ക് മൂന്നര കോടിയുടെ ആനുകൂല്യ വിതരണം
കോഴിക്കോട്: സഊദി കെ.എം.സി.സിക്ക് നാഷണല്‍ കമ്മിറ്റിയുടെ ആസ്ഥാന മന്ദിരം സഊദി കെഎംസിസി സെന്റര്‍ 20ന് (വ്യാഴാഴ്ച) വൈകിട്ട്് മുസ്ലിംലീഗ് സംസ്ഥാന പ്രസിഡണ്ട് പാണക്കാട് സയ്യിദ് സാദിഖലി ശിഹാബ് തങ്ങള്‍ ഉദ്ഘാടനം ചെയ്യും. സഊദി കെഎംസിസി സുരക്ഷാ പദ്ധതിയില്‍ 2024ല്‍ അംഗങ്ങളായിരിക്കെ മരണപ്പെട്ട 40 പ്രവാസികളുടെ കുടുംബങ്ങള്‍ക്ക് ചടങ്ങില്‍ മൂന്നര കോടിയോളം രൂപയുടെ ആനുകൂല്യം വിതരണം ചെയ്യും. ചടങ്ങില്‍ മുസ്ലിംലീഗ് സ്ഥാപക നേതാവ് സയ്യിദ് അബ്ദുറഹ്‌മാന്‍ ബാഫഖി തങ്ങളുടെ അനുസ്മരണ പരിപാടിയും സഊദി കെഎംസിസിയുടെ മുന്‍ ട്രഷറര്‍ ഹാഷിം എന്‍ജിനീയര്‍ സ്മാരക അവാര്‍ഡ് ദാനവും ഹദിയത്തുറഹ്്മ പദ്ധതിയുടെ പ്ലാന്‍ ബിയുടെ പ്രഖ്യാപനവും നടക്കും.
ഒരു കെ.എം.സി.സി കമ്മിറ്റിക്ക് ഇതാദ്യമായാണ് കേരളത്തില്‍ ആസ്ഥാന മന്ദിരം ഉയരുന്നത്. പ്രവാസികള്‍ക്കും പ്രവാസി കുടുംബങ്ങള്‍ക്കും വേണ്ടി നിരവധി പദ്ധതികളുമായി രംഗത്തുള്ള കെ.എം.സി.സി കേരള ട്രസ്റ്റിന്റെ കേന്ദ്രം കൂടിയാകും സഊദി കെഎംസിസിയുടെ ആസ്ഥാനം. ആയിരകണക്കിന് പ്രവാസികള്‍ക്ക് തണലായി മാറിയ സഊദി കെഎംസിസിയുടെ സാമൂഹിക സുരക്ഷാ പദ്ധതി നടപ്പിലാക്കുന്നത് ഈ അംഗീകൃത ട്രസ്റ്റ് വഴിയാണ്. 2014 ല്‍ സഊദി കെഎംസിസി നാഷണല്‍ കമ്മിറ്റി ആരംഭിച്ച സുരക്ഷാ പദ്ധതിയില്‍ ഓരോ വര്‍ഷവും അംഗങ്ങളായിരിക്കെ ഇതുവരെ മരണപ്പെട്ടത് 585 പേരാണ്. അവരുടെ നിരാലംബരായ കുടുംബങ്ങള്‍ക്ക് യഥാസമയം ആനുകൂല്യങ്ങള്‍ വിതരണം ചെയ്തു. ജാതി മതഭേദമന്യേ കക്ഷി രാഷ്ട്രീയത്തിന് അതീതമായി സഊദിയില്‍ തൊഴില്‍ വിസയിലുള്ള ഏതൊരു പ്രവാസിക്കും ഈ പദ്ധതിയില്‍ അംഗങ്ങളായി ചേരാം. ട്രസ്റ്റിന്റെ നിബന്ധനകള്‍ക്ക് വിധേയമായി മൂന്ന് മുതല്‍ പന്ത്രണ്ട് ലക്ഷം വരെയാണ് മരണപ്പെട്ടവരുടെ കുടുംബങ്ങള്‍ക്ക് നല്‍കി വരുന്നത്. മാരക രോഗങ്ങള്‍ ഉള്‍പ്പടെ ചികിത്സാ സഹായവും നല്‍കിവരുന്നുണ്ട്. കഴിഞ്ഞ വര്‍ഷം മാത്രം അഞ്ഞൂറിലധികം പേര്‍ക്ക് ഒന്നരകോടിയിലധികം രൂപ ചികിത്സ സഹായം നല്‍കി.
മൂന്ന് മണിക്ക് നടക്കുന്ന ഉദ്ഘാടന ചടങ്ങ് പാണക്കാട് സയ്യിദ് സാദിഖലി ശിഹാബ് തങ്ങള്‍ ഉദ്ഘാടനം ചെയ്യും. സുരക്ഷാ പദ്ധതി വിതരണ ഉദ്ഘാടനവും തങ്ങള്‍ നിര്‍വഹിക്കും. മുസ്ലിംലീഗ് ദേശീയ ജനറല്‍ സെക്രട്ടറിയും പ്രതിപക്ഷ ഉപനേതാവുമായ പി.കെ കുഞ്ഞാലികുട്ടി മുഖ്യ പ്രഭാഷണം നിര്‍വഹിക്കും. എ.ഐ.സി.സി അംഗവും മുന്‍പ്രതിപക്ഷ നേതാവുമായ വിശിഷ്ടാതിഥി രമേശ് ചെന്നിത്തല ബാഫഖി തങ്ങള്‍ അനുസ്മരണ പ്രഭാഷണം നടത്തും. പ്രസിഡന്റ് കുഞ്ഞിമോന്‍ കാക്കിയ അധ്യക്ഷത വഹിക്കും. വേള്‍ഡ് കെ.എം.സി.സി പ്രസിഡണ്ട് കെ.പി മുഹമ്മദ് കുട്ടി സഊദി കെ.എം.സി.സിയുടെ നാലര പതിറ്റാണ്ടിന്റെ നാള്‍വളികള്‍ വിശദീകരിക്കും. സുരക്ഷാ പദ്ധതി വിശദീകരണം ഉപസമിതി ചെയര്‍മാന്‍ അഷ്റഫ് തങ്ങള്‍ ചെട്ടിപ്പടിയും ഹാഷിം എന്‍ജിനീയര്‍ അവാര്‍ഡ് പരിചയപ്പെടുത്തല്‍ ചെയര്‍മാന്‍ ഖാദര്‍ ചെങ്കളയും നിര്‍വഹിക്കും. സുരക്ഷാ പദ്ധതി കോ ഓര്‍ഡിനേറ്റര്‍ റഫീഖ് പാറക്കല്‍ ആനുകൂല്യ വിതരണത്തിന്റെ ഏകോപനം നടത്തും. ജനറല്‍ സെക്രട്ടറി അഷ്റഫ് വേങ്ങാട്ട് സ്വാഗതവും ട്രഷറര്‍ അഹമ്മദ് പാളയാട്ട് നന്ദിയും പറയും.
ഉദ്ഘാടനത്തോടനുബന്ധിച്ച് ഉച്ചക്ക് 2 മണിക്ക് നടക്കുന്ന മുന്‍ നേതാക്കളുടെ സംഗമം പാണക്കാട് റഷീദലി ശിഹാബ് തങ്ങള്‍ ഉദ്ഘാടനം ചെയ്യും. മുന്‍കാല നേതാക്കളും പ്രവര്‍ത്തകരും ഉള്‍പ്പടെ പങ്കെടുക്കുന്ന ചടങ്ങില്‍ എം എല്‍ എ മാര്‍, മുസ്ലിംലീഗ്, യൂത്ത്‌ലീഗ്, കെഎംസിസി, പ്രവാസി ലീഗ് നേതാക്കള്‍ സംബന്ധിക്കും. കെഎംസിസി മുന്‍കാല നേതാക്കളെ ആദരിക്കുന്ന ചടങ്ങില്‍ കരീം താമരശ്ശേരി, നിസാം മമ്പാട്, സുലൈമാന്‍ മാളിയേക്കല്‍, സൈദ് മൂന്നിയൂര്‍, ഉസ്മാനലി പാലത്തിങ്ങല്‍, ഹാരിസ് കല്ലായി, നാസര്‍ വെളിയങ്കോട്, സൈതലി അരീക്കര, നാസര്‍ എടവനക്കാട് എന്നിവര്‍ നേതൃത്വം നല്‍കും. സെക്രട്ടറി ബഷീര്‍ മൂന്നിയൂര്‍ സ്വാഗതവും സെക്രട്ടറി ഫൈസല്‍ ബാബു നന്ദിയും പറയും
പാണക്കാട് സയ്യിദ് അബ്ബാസലി ശിഹാബ് തങ്ങള്‍, സയ്യിദ് മുനവ്വറലി ശിഹാബ് തങ്ങള്‍, എം.പിമാരായ ഇ ടി മുഹമ്മദ് ബഷീര്‍, പി.വി അബ്ദുല്‍ വഹാബ്, ഡോ. എം.പി അബ്ദുസ്സമദ് സമദാനി, അഡ്വ: ഹാരിസ് ബീരാന്‍, മുസ്ലിംലീഗ് സംസ്ഥാന ജനറല്‍ സെക്രട്ടറി അഡ്വ.പി എം എ. സലാം, സംസ്ഥാന നേതാക്കളായ കെ പി എ മജീദ്, പി കെ കെ ബാവ, ഡോ. എം കെ മുനീര്‍, എം സി മായിന്‍ ഹാജി, അബ്ദുറഹ്‌മാന്‍ കല്ലായി, ഉമ്മര്‍ പാണ്ടികശാല, പ്രൊഫ. ആബിദ് ഹുസൈന്‍ തങ്ങള്‍, കെ.എം ഷാജി, അബ്ദുറഹ്‌മാന്‍ രണ്ടത്താണി, സി.പി സൈതലവി, സി.പി ചെറിയ മുഹമ്മദ്, പാറക്കല്‍ അബ്ദുല്ല, ഷാഫി ചാലിയം, സി മമ്മൂട്ടി, എം എല്‍ എ മാരായ പി കെ ബഷീര്‍, പി അബ്ദുല്‍ ഹമീദ് മാസ്റ്റര്‍, ടി വി ഇബ്രാഹിം, എന്‍. ഷംസുദ്ദീന്‍, കുറുക്കോളി മൊയ്തീന്‍, മഞ്ഞളാംകുഴി അലി, എന്‍. എ. നെല്ലിക്കുന്ന് നജീബ് കാന്തപുരം തുടങ്ങിയവരും സി കെ സുബൈര്‍, പി കെ ഫിറോസ്, ടി പി അഷ്റഫലി, അഡ്വ. ഫൈസല്‍ ബാബു, ഷിബു മീരാന്‍, പി കെ നവാസ്, അഹമ്മദ് സാജു, സി കെ ഷാക്കിര്‍, ഹനീഫ മൂന്നിയൂര്‍, പി ഇമ്പിച്ചഹമ്മദ്, ജില്ലാ മുസ്ലിംലീഗ് നേതാക്കളായ എം എ റസാക്ക് മാസ്റ്റര്‍, ടി ടി ഇസ്മായില്‍, സൂപ്പി നരിക്കാട്ടേരി, അഹമ്മദ് പുന്നക്കല്‍, ചന്ദ്രിക എഡിറ്റര്‍ കമാല്‍ വരദൂര്‍, വേള്‍ഡ് കെഎംസിസി നേതാക്കളായ യു എ നസീര്‍, സി വി എം വാണിമേല്‍, സി കെ വി യുസഫ്, സഊദി ഉള്‍പ്പടെ വിവിധ രാജ്യങ്ങളിലെ കെഎംസിസി നേതാക്കളും ജില്ലാ മണ്ഡലം മുസ്ലിംലീഗ് നേതാക്കളും സാമൂഹിക സാംസ്‌കാരിക രംഗത്തെ പ്രമുഖരും ചടങ്ങില്‍ സംബന്ധിക്കും.
ജില്ലാ മുസ്ലിംലീഗ് പ്രസിഡണ്ട് എം എ റസാക്ക് മാസ്റ്റര്‍, സഊദി കെഎംസിസി നേതാക്കളായ കെ.പി. മുഹമ്മദ്കുട്ടി, കുഞ്ഞിമോന്‍ കാക്കിയ, അഷ്റഫ് വേങ്ങാട്ട്, അഹമ്മദ് പാളയാട്ട്, ഖാദര്‍ ചെങ്കള, അഷ്റഫ് തങ്ങള്‍ ചെട്ടിപ്പടി, ബഷീര്‍ മൂന്നിയൂര്‍, റഫീഖ് പാറക്കല്‍ എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.
സഊദി കെ.എം.സി.സി ആസ്ഥാന മന്ദിരം ഉദ്ഘാടനം 20ന്
