കോട്ടയ്ക്കല്‍ ആര്യവൈദ്യശാല സ്ഥാപകദിനാഘോഷം നാളെ
മലപ്പുറം: കോട്ടയ്ക്കല്‍ ആര്യവൈദ്യശാലയുടെ 81-ാമത് സ്ഥാപകദിനാഘോഷം നാളെ വ്യാഴാഴ്ച ആര്യവൈദ്യശാല ഒ.പി. പരിസരത്ത് (എ.വി.എസ്. സ്‌ക്വയര്‍, ചങ്കുവെട്ടി ജംഗ്ഷന്‍, കോട്ടയ്ക്കല്‍) നടക്കും. മാനേജിങ് ട്രസ്റ്റി ഡോ. പി.എം. വാരിയര്‍ അധ്യക്ഷത വഹിക്കുന്ന സമ്മേളനം നെതര്‍ലാന്‍ഡ്‌സിലെ മുന്‍ ഇന്ത്യന്‍ അംബാസഡര്‍ പ്രൊഫ. വേണു രാജാമണി, ഐ.എഫ്.എസ്. ഉദ്ഘാടനം ചെയ്യും.
ഭാരതീയ വിദ്യാഭവന്‍ കൊച്ചി കേന്ദ്രം ചെയര്‍മാന്‍ ശ്രീ വേണുഗോപാല്‍ സി. ഗോവിന്ദ് വൈദ്യരത്‌നം പി.എസ്. വാരിയര്‍ സ്മാരകപ്രഭാഷണം നിര്‍വഹിക്കും. വിഷയം: ‘ഇന്ത്യ എന്ന ആരോഗ്യക്ഷേമരാഷ്ട്രം – ലക്ഷ്യവും മാര്‍ഗവും’. സാഹിത്യനിരൂപകനും നാടകകൃത്തുമായ ശ്രീ ഇ.പി. രാജഗോപാലന്‍ അനുസ്മരണപ്രഭാഷണം നടത്തും. യോഗത്തില്‍ ആര്യവൈദ്യശാല ചീഫ് എക്‌സിക്യൂട്ടീവ് ഓഫീസര്‍ ശ്രീ കെ. ഹരികുമാര്‍ സ്വാഗതപ്രസംഗവും, ട്രസ്റ്റിയും അഡീ. ചീഫ് ഫിസിഷ്യനുമായ ഡോ. കെ. മുരളീധരന്‍ നന്ദിപ്രകാശനവും നിര്‍വഹിക്കും. അര്‍ഹരായ വിദ്യാര്‍ത്ഥികള്‍ക്കുള്ള വിവിധ അവാര്‍ഡുകളുടെയും സ്‌കോളര്‍ഷിപ്പുകളുടെയും വിതരണം മാനേജിംഗ് ട്രസ്റ്റി നിര്‍വഹിക്കും.
ജീവനക്കാര്‍ക്കും അവരുടെ കുട്ടികള്‍ക്കും വേണ്ടി നടത്തിയ കലാമത്സരങ്ങളില്‍ നിന്ന് തിരഞ്ഞെടുത്ത ഇനങ്ങളുടെ അവതരണവും കലാകായികമത്സരങ്ങളിലെ വിജയികള്‍ക്കുള്ള സമ്മാനദാനവും വൈകുന്നേരം 4.30-ന് നടക്കും. തുടര്‍ന്ന് യെസ് ബാന്റ് കോഴിക്കോട് അവതരിപ്പിക്കുന്ന ‘സംഗീതധാര’ അരങ്ങേറും.
