മദീന ഇമാം ശൈഖ് ഡോ.അബ്ദുള്ള അബ്ദുറഹ്മാന് അല് ബുഅയ്ജാന് ഉദ്ഘാടനം ചെയ്യും
കോഴിക്കോട്: ഇസ്ലാം മാനവികതയുടെയും, സമാധാനത്തിന്റെയും മതം എന്ന വിഷയത്തില് കേരള നദ്വത്തുല് മുജാഹിദീന് (കെ എന്എം) സംസ്ഥാന സമിതി സംഘടിപ്പിക്കുന്ന സമാധാന സമ്മേളനം 12ന് (ചൊവ്വാഴ്ച) വൈകിട്ട് 5 മണിക്ക് കോഴിക്കോട് കടപ്പുറത്ത് നടക്കുമെന്ന് കെ എന് എം പ്രസിഡണ്ട് ടി.പി.അബ്ദുള്ളക്കോയ മദനി വാര്ത്താസമ്മേളനത്തില് പറഞ്ഞു. മദീന ഇമാം ശൈഖ് ഡോ.അബ്ദുള്ള അബ്ദുറഹ്മാന് അല് ബുഅയ്ജാന് സമ്മേളനം ഉദ്ഘാടനം ചെയ്യും. വര്ഗ്ഗീയ വിഭാഗീയ ചിന്തകള്ക്കെതിരെ സൗഹൃദത്തിന്റെയും, സഹിഷ്ണുതയുടെയും സന്ദേശം സമൂഹത്തിന് നല്കുക എന്നതാണ് സമാധാന സമ്മേളനത്തിലൂടെ ലക്ഷ്യമിടുന്നത്. കടപ്പുറത്ത് നടക്കുന്ന മഗ്രിബ് നമസ്കാരത്തിന് മദീന ഇമാം നേതൃത്വം നല്കും.
സമ്മേളനത്തില് മന്ത്രി വി.അബ്ദുറഹിമാന്, ടി.പി.അബ്ദുള്ളക്കോയ മദനി, എം.മുഹമ്മദ് മദനി, പി.കെ.കുഞ്ഞാലിക്കുട്ടി, എം.പിമാരായ എം.കെ.രാഘവന്, ഇ.ടി.മുഹമ്മദ് ബഷീര്, പി.വി.അബ്ദുല് വഹാബ്, അഹമ്മദ് ദേവര്കോവില് എം.എല്.എ, ഡോ.ഫസല് ഗഫൂര്, നൂര് മുഹമ്മദ് നൂര്ഷാ, പി.കെ അഹമ്മദ്, ഡോ.ഹുസൈന് മടവൂര് സംസാരിക്കും.
ഇന്ത്യ സന്ദര്ശിക്കുന്ന മദീന ഇമാം വിവിധ സ്ഥാപനങ്ങള് സന്ദര്ശിക്കും. 14ന് എറണാകുളം വൈറ്റില സലഫി കോംപ്ലക്സില് ജുമുഅക്ക് നേതൃത്വം നല്കും. 9ന് ഡല്ഹി രാംലീല മൈതാനത്ത് നടക്കുന്ന ആള് ഇന്ത്യ അഹ്ലെ ഹദീസ് കോണ്ഫറന്സ് ഉദ്ഘാടനം ചെയ്യും. രാജ്യത്തെ വിവധ സ്ഥാപനങ്ങള് സന്ദര്ശിക്കുന്നതോടൊപ്പം പ്രമുഖ മുസ്ലിം നേതാക്കളുമായി കൂടിക്കാഴ്ച നടത്തും.
വാര്ത്താസമ്മേളനത്തില് ടി.പി.അബ്ദുള്ളക്കോയ മദനി, എ.അസ്ഗറലി , ഡോ.എ.ഐ.അബ്ദുല് മജീദ്, വളപ്പില് അബ്ദുസലാം, ശുക്കൂര് സ്വലാഹി, നിസാര് ഒളവണ്ണ എന്നിവര് പങ്കെടുത്തു.
