ചിലിപ്പൂട്ട് പൊളിച്ച് അര്‍ജന്റീന ക്വാര്‍ട്ടറില്‍
തുടര്‍ച്ചയായ രണ്ടാം മത്സരത്തിലും ലൗതാരോ മാര്‍ട്ടിനസ് തന്നെ രക്ഷകനായി അവതരിച്ചു. 88ാം മിനില്‍ മെസ്സിയെടുത്ത കോര്‍ണറില്‍ നിന്നും വീണുകിട്ടിയ പന്ത് മാര്‍ക്ക് ചെയ്യാതെ നിന്ന മാര്‍ട്ടിനസ് വലയിലേക്ക് തൊടുക്കുകയായിരുന്നു. ഒരൊറ്റ ഗോളിന്റെ ബലത്തില്‍ തുടര്‍ച്ചയായ രണ്ടാം ജയം സ്വന്തമാക്കിയ അര്‍ജന്റീന ക്വാര്‍ട്ടറിലേക്ക് കടന്നു.
4-4-2 ഫോര്‍മേഷനിലാണ് അര്‍ജന്റീന കളത്തിലിറങ്ങിയത്. പന്തടക്കത്തിലും പാസിങ്ങിലുമെല്ലാം മുന്നിട്ടുനിന്ന അര്‍ജന്റീന തന്നെയാണ് മൈതാനം വാണത്. ചിലെ ഗോള്‍മുഖത്തേക്ക് അര്‍ജന്റീന നിരന്തര മുന്നേറ്റം നടത്തിയെങ്കിലും ഫിനിഷിങ്ങില്‍ ഒരുപാട് തവണ പാളി. മറ്റുചിലപ്പോള്‍ ചിലെ ഗോളി ബ്രാവോ വട്ടമിട്ടുനില്‍ക്കുകയും ചെയ്തു.
76ാം മിനുറ്റിലാണ് ചിലെക്ക് ഗോള്‍കുറിക്കാനുള്ള അവസരം ലഭിച്ചത്. എന്നാല്‍ എമിലിയാനോ മാര്‍ട്ടിനസ് രക്ഷകനായി അവതരിച്ചു. 83ാം മിനുറ്റില്‍ മൊലിനയെയും ടാഗിലിയാഫികോയെയും തിരിച്ചുവിളിച്ച് അക്യൂനയെയും മോന്റിയലിനെയും കോച്ച് കളത്തിലിറക്കി. വാര്‍ പരിശോധന നീണ്ടെങ്കിലും ഒടുവില്‍ അര്‍ജന്റീനക്കനുകൂലമായി റഫറി ഗോള്‍ വിധിക്കുകയായിരുന്നു.
