ന്യൂഡല്‍ഹി: തട്ടിപ്പുകള്‍ തടയുന്നതിനും സുരക്ഷ വര്‍ധിപ്പിക്കുന്നതിനും കെവൈസി അപ്ഡേഷന്‍ മാനദണ്ഡങ്ങള്‍ കൂടുതല്‍ ശക്തിപ്പെടുത്താന്‍ ബാങ്കുകള്‍ ആലോചിക്കുന്നതായി റിപ്പോര്‍ട്ട്. അധിക വെരിഫിക്കേഷന് നടത്തി അക്കൗണ്ടുകളെയും അക്കൗണ്ട് ഉടമകളെയും കൂടുതല്‍ കൃത്യതയോടെ തിരിച്ചറിയുന്നതിനുള്ള നടപടികള്‍ സ്വീകരിക്കാനാണ് ബാങ്കുകള്‍ ആലോചിക്കുന്നത്.
കെവൈസി അപ്ഡേഷനുമായി ബന്ധപ്പെട്ട് ബാങ്കുകള്‍ ആര്‍ബിഐയുമായും കേന്ദ്രസര്‍ക്കാരുമായും ചര്‍ച്ച നടത്തി വരികയാണ്. നിലവിലെ എല്ലാ അക്കൗണ്ടുകളും അപ്ഡേറ്റ് ചെയ്യുക എന്നതാണ് ഇതില്‍ പ്രധാനം. ഒന്നിലധികം അക്കൗണ്ടുകളെയോ ജോയിന്റ് അക്കൗണ്ടുകളെയോ ഒരു ഫോണ്‍ നമ്പറുമായി ബന്ധിപ്പിച്ചിരിക്കുന്ന കേസുകള്‍ക്കാണ് കൂടുതല്‍ പ്രാധാന്യം നല്‍കുന്നത്. കൂടാതെ വിവിധ രേഖകള്‍ ഉപയോഗിച്ച് ഒന്നിലധികം അക്കൗണ്ടുകള്‍ തുറന്ന കേസുകളും കൂടുതല്‍ വെരിഫിക്കേഷന് വിധേയമാക്കാനും ബാങ്കുകള്‍ പദ്ധതിയിടുന്നുണ്ട്. ഇതുമായി ബന്ധപ്പെട്ട് ഒരു ക്രമീകരണം ഒരുക്കുന്നതിന് കേന്ദ്രസര്‍ക്കാര്‍ ഒരു കമ്മിറ്റിക്ക് രൂപം നല്‍കിയിട്ടുണ്ട്. ഫിനാന്‍സ് സെക്രട്ടറി ടിവി സോമനാഥന്റെ നേതൃത്വത്തിലുള്ള കമ്മിറ്റിയാണ് ധനകാര്യമേഖലയില്‍ ഒരു പൊതുവായ സംവിധാനം ഒരുക്കുന്നതിനായി ശ്രമിക്കുന്നത്.
ഒന്നിലധികമുള്ള അക്കൗണ്ടുകളെയോ ജോയിന്റ് അക്കൗണ്ടുകളെയോ തിരിച്ചറിയാന്‍ പാന്‍, ആധാര്‍, യുണിക് മൊബൈല്‍ നമ്പര്‍ എന്നിവ ഉപയോഗിക്കുന്നതിന്റെ സാധ്യതയാണ് പരിശോധിക്കുന്നത്. വ്യത്യസ്ത കെവൈസി രേഖകള്‍ ഉപയോഗിച്ച് ഒന്നിലധികം അക്കൗണ്ടുകള്‍ തുറന്ന കേസുകളിലാണ് ഇത് ഫലപ്രദമാകുക. ലിങ്ക് ചെയ്യാത്ത അക്കൗണ്ടുകള്‍ കൂടി തിരിച്ചറിയാന്‍ സഹായിക്കുന്നവിധമാണ് പുതിയ ക്രമീകരണം വരാന്‍ പോകുന്നതെന്ന് ബാങ്ക് വൃത്തങ്ങള്‍ പറയുന്നു. നിലവില്‍ പാസ്പോര്‍ട്ട്, ആധാര്‍, വോട്ടേഴ്സ് ഐഡി കാര്‍ഡ്, പാന്‍ കാര്‍ഡ്, ഡ്രൈവിങ് ലൈസന്‍സ് എന്നിവ ഉണ്ടെങ്കില്‍ അക്കൗണ്ട് ഓപ്പണ്‍ ചെയ്യാന്‍ സാധിക്കും.
