മുംബൈ: യു.എ.ഇ.യില്‍നിന്നും ഇറക്കുമതി ചെയ്ത അസംസ്‌കൃത എണ്ണക്ക് പണം ആദ്യമായി രൂപയില്‍ നല്‍കി ഇന്ത്യ. യു.എ.ഇ.യില്‍നിന്ന് ഇന്ത്യന്‍ ഓയില്‍ കോര്‍പ്പറേഷന്‍ വാങ്ങിയ പത്തുലക്ഷം വീപ്പ എണ്ണയ്ക്കാണ് ഡോളറിന് പകരം രൂപയില്‍ വില നല്‍കിയത്.
ആഗോളതലത്തില്‍ ഡോളറിന് പകരം രൂപ വിനിമയ കറന്‍സിയായി ഉപയോഗിക്കുന്നതിനുള്ള പദ്ധതിയുടെ ഭാഗമായുള്ള ആദ്യ നടപടിയാണിത്. ഊര്‍ജ ഉപഭോഗത്തില്‍ ലോകത്തില്‍ മൂന്നാം സ്ഥാനത്തുള്ള ഇന്ത്യ കൂടുതല്‍ മേഖലകളില്‍ പണമിടപാട് രൂപയില്‍ തന്നെ നടത്താന്‍ പദ്ധതിയിടുന്നുണ്ട്. ഇറക്കുമതി ചെലവില്‍ ഗണ്യമായ നേട്ടമുണ്ടാക്കാന്‍ ഇത് വഴി സാധിക്കും.
എണ്ണ ഇറക്കുമതിയുടെ വില രൂപയില്‍ നല്‍കുന്നതുമായി ബന്ധപ്പെട്ട് കഴിഞ്ഞ ജൂലായില്‍ ഇന്ത്യ യു.എ.ഇ.യുമായി കരാര്‍ ഒപ്പിട്ടിരുന്നു. റഷ്യയില്‍ നിന്നുള്ള എണ്ണ ഇറക്കുമതിക്കും പണം രൂപയില്‍ നല്‍കാന്‍ കരാറായിട്ടുണ്ട്.
യു.എ.ഇയില്‍ നിന്നുള്ള എണ്ണയ്ക്ക് വില
രൂപയില്‍ നല്‍കി ചരിത്രത്തിലാദ്യം ഇന്ത്യ
