കേരള ബ്ലാസ്റ്റേഴ്സിന് കനത്ത തിരിച്ചടിയായി ടീമിലെ സൂപ്പര്‍ താരം അഡ്രിയാന്‍ ലൂണയുടെ പരുക്ക്. താരം ആര്‍ത്രൊസ്‌കോപിക് ശസ്ത്രക്രിയയ്ക്ക് വിധേയനായതായി ക്ലബ്ബ് അധികൃതര്‍ അറിയിച്ചു. കാല്‍മുട്ടിന് പരുക്കേറ്റതിനെ തുടര്‍ന്നായിരുന്നു താരത്തിന് ശസ്ത്രക്രിയ നടത്തേണ്ടതിവന്നത്. കേരള ബ്ലാസ്റ്റേഴ്‌സ് മെഡിക്കല്‍ സ്റ്റാഫും വിദഗ്ധരും ചേര്‍ന്നിട്ടുള്ള സംഘം ലൂണയുടെ ആരോഗ്യനില നിരീക്ഷിച്ചു വരുന്നതായും അദ്ദേഹത്തെ എത്രയും പെട്ടെന്ന് കളത്തിലെത്തിക്കാനുള്ള ശ്രമങ്ങള്‍ നടത്തുകയാണെന്നും പ്രസ്താവനയില്‍ ക്ലബ്ബ് വ്യക്തമാക്കി.
പഞ്ചാബ് എഫ്സിക്കെതിരായ മത്സരത്തിന് മുന്നോടിയായുള്ള പരിശീലനത്തിനിടെയായിരുന്നു ലൂണയ്ക്ക് പരുക്കേറ്റത്. ഗോളടിച്ചും അടിപ്പിച്ചും ലൂണ മഞ്ഞപ്പടയുടെ വിജയങ്ങളില്‍ നിര്‍ണായക പങ്കുവഹിക്കുന്നതിനിടെയാണ് പരുക്ക് തിരിച്ചടിയായത്. മൂന്ന് ഗോളും നാല് അസിസ്റ്റുമാണ് ലൂണയുടെ പേരില്‍ സീസണിലുള്ളത്.താരത്തിന് കുറഞ്ഞത് മൂന്ന് മാസത്തെ വരെ വിശ്രമം ആവശ്യമായി വന്നേക്കാമെന്നും നാട്ടിലേക്ക് മടങ്ങിയേക്കുമെന്നും സൂചനകളുണ്ട്.
നിലവില്‍ 10 കളികളില്‍ നിന്ന് 20 പോയിന്റുമായി പട്ടികയില്‍ ബ്ലാസ്റ്റേഴ്‌സ് രണ്ടാമതാണ്. ഏഴ് കളികളില്‍ നിന്ന് സമാന പോയിന്റുള്ള എഫ്സി ഗോവയാണ് ഒന്നാം സ്ഥാനത്ത്. സീസണില്‍ ബ്ലാസ്റ്റേഴ്സിന് ഇനി 12 മത്സരങ്ങളാണ് അവശേഷിക്കുന്നത്.
