തിരുവനന്തപുരം: അധിക നികുതി പിന്‍വലിക്കണമെന്നാവശ്യപ്പെട്ട് യൂത്ത് കോണ്‍ഗ്രസ് പ്രതിഷേധം. ജില്ലാ കമ്മിറ്റി ഇന്ന് ക്ലിഫ് ഹൗസിലേക്ക് മാര്‍ച്ച് നടത്തും. കളമശ്ശേരിയില്‍ പോലിസ് സ്റ്റേഷന്‍ മാര്‍ച്ച് നടത്തിയ പ്രവര്‍ത്തകരെ മര്‍ദ്ദിച്ചതിനെതിരേയാണ് പ്രതിഷേധം. മുഖ്യമന്ത്രി പങ്കെടുക്കുന്ന പൊതുപരിപാടിക്കും കനത്ത സുരക്ഷയുണ്ട്. നേതാക്കളെ കരുതല്‍ തടങ്കലിലെടുത്താണ് കഴിഞ്ഞ ദിവസം യൂത്ത് കോണ്‍ഗ്രസ് കരിങ്കൊടി പ്രതിഷേധത്തെ പോലിസ് നേരിട്ടത്.
ഷാഫി പറമ്പില്‍ എം.എല്‍.എ ഉള്‍പ്പെടെയുള്ള യൂത്ത് കോണ്‍ഗ്രസ് പ്രവര്‍ത്തകര്‍ക്കെതിരേയുണ്ടായ പോലിസ് അതിക്രമത്തിലും പ്രതിഷേധിച്ചു. കോണ്‍ഗ്രസ്, കെ.എസ്.യു പ്രവര്‍ത്തകരും പ്രതിഷേധത്തിന്റെ ഭാഗമായി അണിനിരന്നിരുന്നു.പാലക്കാട് ജില്ലയിലെ യൂത്ത് കോണ്‍ഗ്രസ് പ്രവര്‍ത്തകര്‍ നഗരത്തില്‍ പന്തംകൊളുത്തി പ്രകടനം നടത്തി. ഡി.സി.സി ഓഫിസ് പരിസരത്ത് നിന്നാരംഭിച്ച പ്രകടനം സ്റ്റേഡിയം സ്റ്റാന്‍ഡില്‍ സമാപിച്ചു.
