ഭോപ്പാൽ: തന്റെ മേൽ മൂത്രമൊഴിച്ച സംഭവത്തിലെ പ്രതിയ വെറുതെ വിടണമെന്ന് ഇരയായ ആദിവാസി യുവാവ്. മധ്യപ്രദേശ് സർക്കാരിനോടാണ് യുവാവ് ഇക്കാര്യം ആവശ്യപ്പെട്ടത്. കേസിൽ പൊലീസ് അറസ്റ്റ് ചെയ്ത പ്രതി പ്രവേശ് ശുക്ലയ്ക്ക് തെറ്റു മനസ്സിലായെന്നും അദ്ദേഹത്തെ വെറുതെ വിടണമെന്നും ഇരയായ ആദിവാസി യുവാവ് ദശ്വന്ത് റാവത്ത് പറഞ്ഞു.
പ്രവേശ് ശുക്ല യുവാവിന്റെ ദേഹത്ത് മൂത്രമൊഴിക്കുന്ന വിഡിയോ ചൊവ്വാഴ്ചയാണ് സമൂഹമാധ്യമങ്ങളിൽ പ്രചരിച്ചത്. തുടർന്ന് പൊലീസ് പ്രവേശ് ശുക്ലയെ അറസ്റ്റ് ചെയ്തിരുന്നു. ഇയാളുടെ ബിജെപി ബന്ധവും വിവാദമായിരുന്നു.
‘‘നടന്നതു നടന്നു. അദ്ദേഹത്തിനു തന്റെ തെറ്റ് മനസ്സിലായി. ഇനി പ്രവേശ് ശുക്ലയെ മോചിപ്പിക്കണം. വലിയ തെറ്റു തന്നെയാണ് അദ്ദേഹത്തിന്റെ ഭാഗത്തു നിന്ന് സംഭവിച്ചിരിക്കുന്നത്. അദ്ദേഹം ഞങ്ങളുടെ നാട്ടിലെ പണ്ഡിറ്റാണ്. അതുകൊണ്ടു തന്നെ അദ്ദേഹത്തെ മോചിപ്പിക്കണമെന്നാണ് ഞങ്ങൾക്കു സർക്കാരിനോട് ആവശ്യപ്പെടാനുള്ളത്.’’– റാവത്ത് മാധ്യമപ്രവർത്തകരോടു പറഞ്ഞു.
ഗ്രാമത്തില്‍ റോഡു പണിയണമെന്നല്ലാതെ സർക്കാരിനോട് മറ്റൊന്നും ആവശ്യപ്പെടാനില്ലെന്നും റാവത്ത് വ്യക്തമാക്കി.
സംഭവത്തിൽ ഖേദം രേഖപ്പെടുത്തിയ മധ്യപ്രദേശ് മുഖ്യമന്ത്രി ശിവരാജ് സിങ് ചൗഹാൻ ദശ്വന്തിന്റെ കാൽ കഴുകി മാപ്പു പറഞ്ഞിരുന്നു. പ്രതിയുടെ വീടും അധികൃതർ തകർത്തിരുന്നു.
