വാഷിംഗ്ടണ്‍: അമേരിക്കയിലുള്ള സാന്‍ഫ്രാന്‍സിസ്‌കോയിലെ ഇന്ത്യന്‍ കോണ്‍സുലേറ്റിന് നേരെ ആക്രമണം. കോണ്‍സുലേറ്റില്‍ തീയിടുകയും ചെയ്തു. ഖലിസ്ഥാന്‍ വാദികളാണ് തീയിടാന്‍ ശ്രമിച്ചത്. പെട്ടെന്ന് തീയണച്ചതിനാല്‍ വലിയ അപകടമാണ് ഒഴിവായത്. ആക്രമണത്തെ ശക്തമായി അപലപിച്ച് അമേരിക്ക രംഗത്തെത്തിയിട്ടുണ്ട്.
ആക്രമണത്തിന്റെ ഉത്തരവാദിത്തം ഏറ്റെടുത്ത് ഖലിസ്ഥാന്‍ വാദികള്‍ തീവയ്പ്പിന്റെ വീഡിയോ പുറത്തുവിട്ടിട്ടുണ്ട്. ഇന്ത്യന്‍ സര്‍ക്കാര്‍ ആക്രമണത്തെ ശക്തമായി അപലപിച്ചിട്ടുണ്ട്. കഴിഞ്ഞ മാര്‍ച്ചിലും സാന്‍ഫ്രാന്‍സിസ്‌കോയിലെ ഇന്ത്യന്‍ കോണ്‍സുലേറ്റിന് നേരെ ഖലിസ്ഥാന്‍വാദികള്‍ അതിക്രമം നടത്തിയിരുന്നു. സംഭവത്തില്‍ കുറ്റക്കാര്‍ക്കെതിരെ കര്‍ശന നടപടി സ്വീകരിക്കണമെന്ന് അമേരിക്കയിലെ ഇന്ത്യന്‍ പൗരന്മാരുടെ സംഘടനകള്‍ ആവശ്യപ്പെട്ടു.
അമൃത്പാല്‍ സിങ്ങിനെ മോചിപ്പിക്കണമെന്ന് ആവശ്യപ്പെട്ടാണ് അക്രമകാരികള്‍ സാന്‍ ഫ്രാന്‍സിസ്‌കോയിലെ കോണ്‍സുലേറ്റില്‍ അതിക്രമം നടത്തിയത്. കെട്ടിടത്തിന്റെ ചുമരില്‍ സ്‌പ്രേ പെയിന്റ് ഉപയോഗിച്ച് അമൃത് പാലിനെ മോചിപ്പിക്കണമെന്ന് ഖലിസ്ഥാന്‍വാദികള്‍ എഴുതിയിരുന്നു.
