ബെംഗളൂരു: സാഫ് ചാമ്പ്യൻഷിപ്പ് ഫുട്ബോളിൽ രണ്ടാം മത്സരത്തിൽ നേപ്പാളിനെ മറുപടിയില്ലാത്ത രണ്ട് ഗോളുകൾക്ക് തകർത്ത് ഇന്ത്യ. ഇതോടെ ടീം സെമി ഫൈനലിൽ പ്രവേശിച്ചു. കാപ്റ്റൻ സുനിൽ ഛേത്രിയും മഹേഷ് സിങ്ങും ഗോൾ നേടി. അതേസമയം നേപ്പാൾ ആദ്യ മത്സരത്തിൽ കുവൈത്തിനോട് പരാജയപ്പെട്ടിരുന്നു. രണ്ടാം മത്സരവും തോറ്റതോടെ നേപ്പാൾ പുറത്തായി. ആറ് പോയിന്റാണ് ഇന്ത്യയ്ക്ക്.
രണ്ട് മത്സരങ്ങളിലും ഗോളുകളൊന്നും വഴങ്ങിയില്ലെന്ന പ്രത്യേകതയും ഉണ്ട്. കഴിഞ്ഞ ഒമ്പത് മത്സരങ്ങളിലും ഇന്ത്യൻ ടീം ഗോളുകൾ വഴങ്ങിയിട്ടില്ല.
രണ്ടാം പകുതിയിലാണ് നേപ്പാളിനെതിരായ ഇന്ത്യയുടെ ഗോളുകൾ. പാകിസ്താനെതിരായ കഴിഞ്ഞ കളിയിലെ മുന്നേറ്റം ആദ്യ പകുതിയിൽ ആവർത്തിക്കാൻ ഇന്ത്യയ്ക്കായില്ല. 61ാം മിനിറ്റിലാണ് മഹേഷ് സിങ് നൽകിയ പന്ത് പോസ്റ്റിലേക്ക് പായിച്ച് ഛേത്രി ആദ്യ ഗോൾ നേടിയത്. ആന്താരാഷ്ട്ര മത്സരത്തിൽ അദ്ദേഹത്തിന്റെ 91ാം ഗോൾ ആയിരുന്നു അത്. പിന്നാലെ 70-ാം മിനിറ്റിൽ മഹേഷ് സിങ് ഇന്ത്യയുടെ രണ്ടാം ഗോൾ നേടി.
സുനിൽ ഛേത്രിയുടെ ഷോട്ട് നേപ്പാൾ ഗോൾകീപ്പർ തട്ടിയകറ്റിയത് ക്രോസ്ബാറിലിടിച്ച് നേരെ കിട്ടിയത് മഹേഷിനായിരുന്നു. അദ്ദേഹം അത് വലയിലാക്കുകയും ചെയ്തു.
