ഷെയ്ൻ നിഗം, നീരജ് മാധവ്, ആന്റണി വർഗീസ് എന്നിവർ പ്രധാന കഥാപാത്രങ്ങളായെത്തുന്ന ‘RDX’ എന്ന ചിത്രത്തിന്റെ ഫസ്റ്റ് ലുക്ക് പോസ്റ്ററും മോഷൻ പോസ്റ്ററും പുറത്തുവിട്ടു. ബക്രീദിന് ചിത്രത്തിന്റെ ടീസർ പുറത്തുവിടുമെന്നും അണിയറ പ്രവർത്തകർ പ്രഖ്യാപിച്ചു. ചിത്രം ഓണത്തിന് റിലീസ് ചെയ്യും.
നഹാസ് ഹിദായത്ത് സംവിധാനം ചെയ്ത ‘RDX’ ഒരു സമ്പൂർണ്ണ ആക്ഷൻ എന്റർടെയ്‌നർ ആയിരിക്കും. റോബർട്ട്, സേവ്യർ, ഡോണി എന്നീ കഥാപാത്രങ്ങളായാണ് യഥാക്രമം ഷെയ്ൻ നിഗം, നീരജ് മാധവ്, ആന്റണി വർഗീസ് എന്നിവർ എത്തുക.
നഹാസ് ഹിദായത്ത്, ഷബാസ് റഷീദ്, ആദർശ് സുകുമാരൻ എന്നിവർ ചേർന്ന് രചിച്ച തിരക്കഥ മൂന്ന് നിഗൂഢ വ്യക്തികളുടെ ജീവിതത്തെ ചുറ്റിപ്പറ്റിയാണ്. അഭിനേതാക്കളായ മഹിമ നമ്പ്യാർ, മാലാ പാർവതി, നിശാന്ത് സാഗർ, ബൈജു എന്നിവരും ‘ആർഡിഎക്‌സി’ൽ പ്രധാന കഥാപാത്രങ്ങളെ അവതരിപ്പിക്കുന്നു.
