വീട്ടുടമയെ കാണാനില്ല
പാലക്കാട്: കേരളശ്ശേരിയിലെ യക്കിക്കാവിലെ വീട്ടിലുണ്ടായ സ്‌ഫോടനത്തില്‍ ഒരു മരണം. മരിച്ചയാളെ തിരിച്ചറിയാനായില്ല. വീടിനോട് ചേര്‍ന്ന് പടക്ക നിര്‍മാണ സാമഗ്രികള്‍ സൂക്ഷിച്ചിരുന്ന ചായ്പ്പില്‍ ആണ് പൊട്ടിത്തെറി ഉണ്ടായത്. രാവിലെ 10 മണിയോടെ അബ്ദുള്‍ റസാഖ് എന്നയാളുടെ വീട്ടിലാണ് സംഭവം നടന്നത്. സ്‌ഫോടനത്തില്‍ വീടിന്റെ ഒരു ഭാഗം നശിച്ചിട്ടുണ്ട്.
എങ്ങനെ സ്‌ഫോടനം ഉണ്ടായെന്ന് വ്യക്തമല്ല. അബ്ദുള്‍ റസാഖിന് പടക്കം നിര്‍മ്മിക്കാനുള്ള ലൈസന്‍സുണ്ട്. തടുക്കുശേരിയില്‍ ഇയാള്‍ക്ക് ഒരു പടക്കനിര്‍മ്മാണശാലയുമുണ്ട്. പടക്കം എന്തിന് വീട്ടില്‍ സൂക്ഷിച്ചു എന്ന കാര്യത്തില്‍ വ്യക്തതയില്ല. സ്‌ഫോടനം നടക്കുമ്പോള്‍ അബ്ദുള്‍ റസാഖ് വീടിന് സമീപത്തുണ്ടായിരുന്നുവെന്നാണ് ലഭിക്കുന്ന വിവരം. ഇയാളുടെ ഭാര്യ അയല്‍ വീട്ടില്‍ പോയിരിക്കുകയായിരുന്നു. വീട്ടുടമ റസാഖിനെ സ്‌ഫോടന ശേഷം കാണാനില്ല. എന്നാല്‍ സ്‌ഫോടന സ്ഥലത്തുനിന്ന് കിട്ടിയ ശരീരാവശിഷ്ടങ്ങള്‍ ആരുടേതെന്ന് തിരിച്ചറിയാനായിട്ടില്ല. പരിശോധനയുടെ ഭാഗമായി സാംപിളുകള്‍ ശേഖരിച്ചിട്ടുണ്ട്.
