കോഴിക്കോട്: എന്‍.ഐ.ടിയിലെ സ്‌കൂള്‍ ഓഫ് മാനേജ്‌മെന്റ് സ്റ്റഡീസ് (എസ്.ഒ.എം.എസ്) നടത്തുന്ന 2023-25 വര്‍ഷത്തെ മുഴുവന്‍ സമയ എം.ബി.എ പ്രോഗ്രാമിലേക്കുള്ള പ്രവേശനത്തിന് യോഗ്യരായ വിദ്യാര്‍ത്ഥികളില്‍ നിന്ന് അപേക്ഷ ക്ഷണിച്ചു. സ്‌കൂള്‍ ഓഫ് മാനേജ്‌മെന്റ് സ്റ്റഡീസ് (എസ്.ഒ.എം.എസ്), എന്‍.ഐ.ടി കാലിക്കറ്റ് ഡ്യുവല്‍ സ്‌പെഷ്യലൈസേഷനുകളുള്ള രണ്ട് വര്‍ഷത്തെ മുഴുവന്‍ സമയ എംബിഎ പ്രോഗ്രാം വാഗ്ദാനം ചെയ്യുന്നു. എം.ബി.എയുടെ രണ്ടാം വര്‍ഷത്തില്‍ ലഭ്യമായ അഞ്ച് സ്‌പെഷ്യലൈസേഷനുകളില്‍ ഏതെങ്കിലും രണ്ട് മേജറുകള്‍ വിദ്യാര്‍ത്ഥികള്‍ക്ക് തിരഞ്ഞെടുക്കാം: (i) ഫിനാന്‍സ് മാനേജ്‌മെന്റ്, (ii) ഹ്യൂമന്‍ റിസോഴ്‌സ് മാനേജ്‌മെന്റ്, (iii) ഓപ്പറേഷന്‍സ് മാനേജ്‌മെന്റ്, (iv) മാര്‍ക്കറ്റിംഗ് മാനേജ്‌മെന്റ്, (v) ബിസിനസ് അനലിറ്റിക്‌സ് ആന്റ് സിസ്റ്റംസ്.
എം.ബി.എ ഡിഗ്രി പ്രോഗ്രാമിലേക്ക് പ്രവേശനം തേടുന്ന വിദ്യാര്‍ത്ഥികള്‍, ഓപ്പണ്‍/ഇ.ഡബ്ല്യു.എസ്/ഒ.ബി.സി വിഭാഗങ്ങള്‍ക്ക് കുറഞ്ഞത് 60% മാര്‍ക്കോടെ (അല്ലെങ്കില്‍ സി.ജി.പി.എ 6.5/10) അംഗീകൃത ഇന്‍സ്റ്റിറ്റ്യൂട്ട്/യൂണിവേഴ്‌സിറ്റിയില്‍ നിന്ന് ഏതെങ്കിലും വിഷയത്തില്‍ റെഗുലര്‍ ഫുള്‍ ടൈം ബിരുദം നേടിയിരിക്കണം. എസ്.സി, എസ്.ടി വിഭാഗങ്ങളില്‍ നിന്നുള്ള വിദ്യാര്‍ത്ഥികള്‍ക്ക് 55 ശതമാനം മാര്‍ക്ക് (അല്ലെങ്കില്‍ സിജിപിഎ 6/10) മതിയാവും. നിലവില്‍ ബിരുദാനന്തര ബിരുദ പ്രോഗ്രാമിന്റെ അവസാന വര്‍ഷത്തില്‍ പഠിക്കുന്ന ഉദ്യോഗാര്‍ത്ഥികള്‍ക്കും എംബിഎ പ്രോഗ്രാമിന് അപേക്ഷിക്കാന്‍ അര്‍ഹതയുണ്ട്. അത്തരം ഉദ്യോഗാര്‍ത്ഥികള്‍ തിരഞ്ഞെടുക്കപ്പെട്ടാല്‍, പ്രോഗ്രാം ആരംഭിക്കുന്നതിന് മുമ്പ്, മുകളില്‍ പറഞ്ഞിരിക്കുന്ന കുറഞ്ഞ മാര്‍ക്കോടെ യോഗ്യതാ ബിരുദത്തിനുള്ള എല്ലാ ആവശ്യകതകളും പൂര്‍ത്തിയാക്കുകയും പ്രോഗ്രാമില്‍ ചേര്‍ന്ന് രണ്ട് മാസത്തിനുള്ളില്‍ പ്രൊവിഷണല്‍ ഡിഗ്രി സര്‍ട്ടിഫിക്കറ്റ് ഹാജരാക്കുകയും ചെയ്യുക എന്ന വ്യവസ്ഥയില്‍ താല്‍ക്കാലികമായി പ്രവേശനം നേടും. അപേക്ഷകര്‍ക്ക് 2022-ല്‍ IIM-കള്‍ നടത്തിയ കോമണ്‍ അഡ്മിഷന്‍ ടെസ്റ്റില്‍ (CAT) സാധുവായ സ്‌കോര്‍ ഉണ്ടായിരിക്കണം. പ്രവേശനത്തിനുള്ള സെലക്ഷന്‍ നടപടിക്രമത്തിന്റെ ഭാഗമായി നടത്തുന്ന ഗ്രൂപ്പ് ചര്‍ച്ചകളിലും വ്യക്തിഗത അഭിമുഖങ്ങളിലും അവരുടെ പ്രകടനത്തെ അടിസ്ഥാനമാക്കിയായിരിക്കും വിദ്യാര്‍ത്ഥികളെ തിരഞ്ഞെടുക്കുക.
NIT കാലിക്കറ്റില്‍ എം.ബി.എ പഠിക്കാന്‍ തൊഴിലുടമകള്‍ സ്‌പോണ്‍സര്‍ ചെയ്യുന്ന ഉദ്യോഗാര്‍ത്ഥികള്‍ക്കായി ആകെ അഞ്ച് സീറ്റുകള്‍ സംവരണം ചെയ്തിട്ടുണ്ട്. സാധാരണ ഉദ്യോഗാര്‍ത്ഥികള്‍ക്ക് നിര്‍ദേശിച്ചിട്ടുള്ള ഏതെങ്കിലും വിഷയങ്ങളില്‍ ബിരുദം നേടിയ ശേഷം അത്തരം അപേക്ഷകര്‍ക്ക് സ്‌പോണ്‍സറിങ് ഓര്‍ഗനൈസേഷനില്‍ കുറഞ്ഞത് മൂന്ന് വര്‍ഷത്തെ പ്രവൃത്തി പരിചയം ഉണ്ടായിരിക്കണം. CAT/CMAT അല്ലെങ്കില്‍ തത്തുല്യമായ ദേശീയതല പ്രവേശന പരീക്ഷകളില്‍ സാധുവായ സ്‌കോര്‍ ഉള്ള അപേക്ഷകര്‍ക്ക് മുന്‍ഗണന നല്‍കും.
അപേക്ഷാ ഫീസ്: ഓപ്പണ്‍/ഇ.ഡബ്ല്യു.എസ്/ഒ.ബി.സി/പി.ഡബ്ല്യു.ഡി ഉദ്യോഗാര്‍ത്ഥികള്‍ക്ക് 1,000/ രൂപ, എസ്.സി/എസ്.ടി വിഭാഗക്കാര്‍ക്ക് 500 രൂപ. പൂരിപ്പിച്ച അപേക്ഷകള്‍ സമര്‍പ്പിക്കാനുള്ള അവസാന തീയതി 2023 മാര്‍ച്ച് 31 ആണ്.
കൂടുതല്‍ വിവരങ്ങള്‍ക്ക് www.nitc.ac.in അല്ലെങ്കില്‍ www.soms.nitc.ac.in സന്ദര്‍ശിക്കുക. ഫോണ്‍: ചെയര്‍പേഴ്‌സണ്‍-പിജി അഡ്മിഷന്‍സ്, എന്‍.ഐ.ടി കോഴിക്കോട് (0495-2286119) അല്ലെങ്കില്‍ കോര്‍ഡിനേറ്റര്‍-എം.ബി.എ അഡ്മിഷന്‍സ്, SOMS, NIT കാലിക്കറ്റ് (0495 2286075, 0495 2286076).
