തിരുവനന്തപുരം: ഇ.പി ജയരാജനെതിരേ അനധികൃത റിസോര്‍ട്ട് നിര്‍മാണവുമായി ബന്ധപ്പെട്ട് ഉയര്‍ന്ന അഴിമതിയാരോപണങ്ങളില്‍ മുഖ്യമന്ത്രിയുടെ മൗനം അമ്പരപ്പിക്കുന്നുവെന്ന് പ്രതിപക്ഷ നേതാവ് വി.ഡി സതീശന്‍. ഈ റിസോര്‍ട്ട് സംബന്ധിച്ച എല്ലാ കാര്യങ്ങളും മുഖ്യമന്ത്രി ഉള്‍പ്പെടെയുള്ള മുഴുന്‍ സി.പി.എം നേതാക്കള്‍ക്കും അറിയാം. തുടര്‍ഭരണം വന്ന് കഴിഞ്ഞപ്പോള്‍ കഴിഞ്ഞ അഞ്ചാറ് വര്‍ഷമായുള്ള പാര്‍ട്ടിയിലെ ജീര്‍ണതകളെല്ലാം ഒന്നൊന്നായി പുറത്ത് വരികയാണ്. പാര്‍ട്ടിയും മറ്റു ഉന്നത നേതാക്കളുമെല്ലാം ഈ വിഷയത്തില്‍ പ്രതികരിക്കുന്നില്ലെന്ന് മാത്രമല്ല നിഷേധിക്കുന്നുമില്ല, ഈ സാഹചര്യത്തിലാണ് നമുക്ക് പ്രതികരിക്കേണ്ടി വരുന്നത്. കെ.പി.സി.സി അധ്യക്ഷനും കണ്ണൂര്‍ ഡി.സി.സിയും മുമ്പ് തന്നെ ഈ റിസോര്‍ട്ട് സംബന്ധിച്ച ആരോപണങ്ങള്‍ ഉന്നയിച്ചിട്ടുണ്ടെന്ന് വി.ഡി സതീശന്‍ പറഞ്ഞു.
നേരത്തെ മന്ത്രിയായിരുന്നയാള്‍ അനധികൃതമായി സമ്പാദിച്ച പണം കൊണ്ടാണ് ഈ റിസോര്‍ട്ട് കെട്ടിപ്പെടുത്തിരിക്കുന്നത്. റിസോര്‍ട്ട് മാഫിയയും അനധികൃത പണസമ്പാദനവും കള്ളപ്പണം വെളുപ്പിച്ചതും എല്ലാം പുറത്തുവരികയാണ്. അപ്പോള്‍ ആ പാര്‍ട്ടിയിലെ തന്നെ ഒരു വിഭാഗം പറയുന്നു. മറ്റൊരു നേതാവിന് സ്വര്‍ണ്ണക്കള്ളക്കടത്ത് സംഘവും ക്വട്ടേഷന്‍ സംഘവുമായി ബന്ധമുണ്ടെന്നാണ്. ഇരുമ്പ് മറക്ക് പിന്നിലായിരുന്ന പല കാര്യങ്ങളും പുറത്ത് വരികയാണ്. സാമൂഹ്യവിരുദ്ധ ശക്തികളുമായുള്ള ഓരോ സി.പി.എം നേതാക്കളുടെ ബന്ധമാണ് ഇതിലൂടെ പുറത്തുവരുന്നതെന്നും പ്രതിപക്ഷ നേതാവ് പറഞ്ഞു.
