മാഹി: ഷോട്ട്പുട്ട് കൊണ്ടുള്ള ഏറുക്കൊണ്ട് വിദ്യാര്‍ഥിക്ക് പരുക്കേറ്റു. പളളൂര്‍ കസ്തൂര്‍ബാ ഗാന്ധി ഗവ. ഹൈസ്‌കൂളിലെ ഒന്‍പതാം തരം വിദ്യാര്‍ത്ഥി സൂര്യ കിരണ്‍(14) നെ തലക്ക് സാരമായി പരിക്കേറ്റ നിലയില്‍ തലശ്ശേരി സഹകരണ ആശുപത്രിയിലേക്കും തുടര്‍ന്ന് കോഴിക്കോട് സ്വകാര്യ ആശുപത്രിയിലേക്കും കൊണ്ടുപോയി. ഇന്നലെ ഉച്ചക്ക് ശേഷം സ്‌പോര്‍ട്‌സ് ദിനത്തോടനുബന്ധിച്ച് സെലക്ഷന്‍ നടക്കവെ, ഷോട്ട്പുട്ട് മത്സരം കഴിഞ്ഞ് ഗ്രൗണ്ടിന്റെ മുലയില്‍ വച്ചിരുന്ന ഷോട്ട്പുട്ട് മറ്റൊരു കുട്ടി എടുത്തെറിഞ്ഞപ്പോള്‍, അബദ്ധത്തില്‍ സൂര്യകിരണിന്റ തലയില്‍ വീഴുകയായിരുന്നു. ഉടന്‍ തന്നെ അധ്യാപകര്‍ കുട്ടിയെ സഹകരണ ആശുപത്രിയിലെത്തിക്കുകയായിരുന്നു.
