അധിക സിലിണ്ടറിന് പ്രത്യേകം അപേക്ഷിക്കണം
കൊച്ചി: പാചകവാതക സിലിണ്ടര്‍ ഉപയോഗത്തില്‍ നിയന്ത്രണം പ്രാബല്യത്തില്‍. ഗാര്‍ഹിക ഉപയോഗത്തിനുള്ള പാചകവാതകത്തിനാണ് നിയന്ത്രണം വന്നത്. ഇനി മുതല്‍ ഒരു വര്‍ഷം 15 സിലിണ്ടര്‍ മാത്രമേ ലഭിക്കൂ. ഗാര്‍ഹിക പാചക വാതകത്തിന്റെ ദുരുപയോഗം തടയാനാണ് പുതിയ നിയന്ത്രണം. ഒരു വര്‍ഷം ഇനി 15 സിലിണ്ടര്‍ മാത്രമേ ലഭിക്കൂ. കൂടുതല്‍ വേണമെങ്കില്‍ പ്രത്യേകം അപേക്ഷിക്കണം. കേന്ദ്ര സര്‍ക്കാര്‍ നിര്‍ദേശ പ്രകാരം പൊതുമേഖലാ കമ്പനികള്‍ നിയന്ത്രണം നടപ്പാക്കി തുടങ്ങി.
ഇനി മുതല്‍ അധിക സിലിണ്ടര്‍ വേണമെങ്കില്‍ വീട്ടിലെ അംഗസംഖ്യ തെളിയിക്കുന്ന റേഷന്‍ കാര്‍ഡിന്റെ പകര്‍പ്പുള്‍പ്പടെ നല്‍കി ഡീലര്‍മാര്‍ മുഖേനെ അപേക്ഷ നല്‍കാമെന്നാണ് കമ്പനികള്‍ പറയുന്നത്. അധിക സിലിണ്ടര്‍ അനുവദിക്കാനുള്ള ചുമതല കമ്പനിയുടെ വിവേചന അധികാരത്തിലുള്‍പ്പെടും. ഇതോടെ ആഹാരം പാചകം ചെയ്യാന്‍ പാചകവാതകത്തെ മാത്രം ആശ്രയിക്കുന്ന കുടുംബങ്ങള്‍ സ്വയം നിയന്ത്രണം ഏര്‍പ്പെടുത്തേണ്ടി വരും. എന്നാല്‍ കേരളത്തില്‍ ശരാശരി ഉപയോഗം ഒരു കുടുംബത്തില്‍ പ്രതിവര്‍ഷം പന്ത്രണ്ട് സിലിണ്ടറിന് താഴെയാണെന്നാണ് ഡീലര്‍മാര്‍ പറയുന്നത്.
