കോഴിക്കോട്: എല്ലാവരെയും ഒരുമിച്ചു നിര്‍ത്തി രാജ്യപുരോഗതിക്കും വളര്‍ച്ചക്കും വേണ്ടി പ്രവര്‍ത്തിക്കുക എന്നതാണ് തന്റെ രാഷ്ട്രീയദൗത്യമെന്ന് ഡോ. ശശി തരൂര്‍ എം.പി. മര്‍കസില്‍ വിദ്യാര്‍ത്ഥികളുമായി സംവദിക്കുകയായിരുന്നു അദ്ദേഹം.
കാന്തപുരം ഉസ്താദിന്റെ മനസ്സും മനോഭാവവും അറിയാന്‍ കഴിഞ്ഞ ഒരാളാണ് ഞാന്‍. കാശ്മീര്‍ മുതല്‍ കന്യാകുമാരി വരെ വ്യാപിച്ചുകിടക്കുന്ന മര്‍കസ് സ്ഥാപനങ്ങളും വിദ്യാര്‍ത്ഥികളും രാജ്യത്തിനും സമൂഹത്തിനും വേണ്ടി സേവനം ചെയ്യുമെന്നാണ് എന്റെ വിശ്വാസമെന്നും അദ്ദേഹം പറഞ്ഞു. ഭരണഘടനയിലൂടെ ഡോ. അംബേദ്കര്‍ ആഗ്രഹിച്ചതുപോലെ എല്ലാവിഭാഗം ജനങ്ങള്‍ക്കും സന്തോഷത്തോടെ വസിക്കാന്‍ സാധിക്കുന്ന ഇന്ത്യക്കുവേണ്ടിയാവണം നമ്മുടെ പ്രവര്‍ത്തനം. എല്ലാ ജാതിമത വിഭാഗങ്ങളെയും ഒന്നായിക്കാണുന്ന സമീപനം ഉണ്ടാകുമ്പോഴേ സമുദായങ്ങള്‍ക്കിടയില്‍ സാഹോദര്യം ഉണ്ടാവൂ. എങ്കിലേ രാജ്യത്തിന് ഒന്നാമതെത്താന്‍ കഴിയൂവെന്നും അദ്ദേഹം കൂട്ടിച്ചേര്‍ത്തു.
സമസ്ത കേരള ജംഇയ്യത്തുല്‍ ഉലമ സെക്രട്ടറിയും മര്‍കസ് വൈസ് പ്രസിഡന്റും പ്രധാനാധ്യാപകനുമായ കാന്തപുരം എ.പി മുഹമ്മദ് മുസ്ലിയാരെ അദ്ദേഹം ചടങ്ങില്‍ അനുസ്മരിച്ചു. എം.കെ രാഘവന്‍ എം.പി, കേരള മുസ്ലിം ജമാഅത്ത് സംസ്ഥാന സെക്രട്ടറി സയ്യിദ് ഇബ്റാഹീമുല്‍ ഖലീല്‍ അല്‍ ബുഖാരി, സംസ്ഥാന ഹജ്ജ് കമ്മിറ്റി ചെയര്‍മാന്‍ സി. മുഹമ്മദ് ഫൈസി, മര്‍കസ് നോളേജ് സിറ്റി ഡയറക്ടര്‍ ഡോ. മുഹമ്മദ് അബ്ദുല്‍ ഹകീം അസ്ഹരി, സി. യൂസുഫ് ഹൈദര്‍, മജീദ് കക്കാട് സംബന്ധിച്ചു.
