തിരുവനന്തപുരം: കേരളത്തിലെ ആദ്യത്തെ കൈത്തറി മേഖലയിലെ ഉല്‍പാദക കമ്പനിയായ ബാലരാമപുരം ഹാന്റ്‌ലൂം പ്രൊഡ്യൂസര്‍ കമ്പനിയുടെ ഉദ്ഘാടനവും പരിശീലന കേന്ദ്രത്തിന്റെ ഉദ്ഘാടനവും കേന്ദ്ര ധനകാര്യമന്ത്രി നിര്‍മ്മല സീതാരാമന്‍ നിര്‍വഹിച്ചു. ചടങ്ങില്‍ ബാലരാമപുരം കൈത്തറി സാരി ധരിച്ചാണ് മന്ത്രി പങ്കെടുത്തത്. മറ്റ് സിന്തറ്റിക് വസ്ത്രങ്ങളെക്കാല്‍ മൃദുലവും, വെണ്ണപോലെ സോഫ്റ്റുമാണ് കൈത്തറി വസ്ത്രങ്ങളെന്ന് കേന്ദ്ര മന്ത്രി പറഞ്ഞു. കൈത്തറി രംഗം സുസ്ഥിരമായി നിലനിര്‍ത്തുന്നതിന് വേണ്ടിയുള്ള കര്‍മ പദ്ധതികള്‍ ബാലരാമപുരം ഹാന്റ്‌ലൂം പ്രൊഡ്യൂസര്‍ കമ്പനിയുടെ നേതൃത്വത്തില്‍ തയാറാക്കണണം. പുതിയ തലമുറയില്‍പ്പെട്ടവരെ ഈ രംഗത്ത് കൊണ്ടുവരാന്‍ കൈത്തറി കാലഘട്ടത്തിന് അനുസരിച്ചുള്ള മാറ്റങ്ങള്‍ ഉള്‍ക്കൊള്ളണം. അതിന് ഹാന്റ്‌ലൂം പ്രൊഡ്യൂസര്‍ കമ്പനിക്ക് നേതൃത്വം നല്‍കാനാകുമെന്നും കേന്ദ്രമന്ത്രി പ്രത്യാശ പ്രകടിപ്പിച്ചു.
പ്രധാനമന്ത്രി ഉള്‍പ്പെടെയുള്ളവരുടെ യോഗങ്ങളില്‍ ടെക്റ്റയില്‍സ് വ്യവസായത്തെക്കുറിച്ച് പ്രതിപാദിക്കുമ്പോള്‍ അഞ്ച് എഫ് (F)കളെ മുന്‍നിര്‍ത്തിയാണ് സംസാരിക്കുന്നത്. അത് പോലെയാകണം ബാലരാമപുരം കൈത്തറിയും ശ്രദ്ധ ചെലുത്തേണ്ടത്. ഫാര്‍മര്‍, ഫൈബര്‍, ഫാക്ടറി, ഫാഷന്‍ , ഫോറിന്‍ എന്നിങ്ങനെയുള്ള അഞ്ച് എഫുകള്‍ ലക്ഷ്യമിട്ട് പ്രവര്‍ത്തിക്കുമ്പോള്‍ ഈ മേഖല കൂടുതല്‍ നേട്ടത്തിന്റെ നെറുകയില്‍ എത്തുമെന്നും മന്ത്രി പറഞ്ഞു. ചടങ്ങില്‍ പരമ്പരാഗത കൈത്തറി തൊഴിലാളികളെ പൊന്നാടയണിച്ച് കേന്ദ്ര മന്ത്രി ആദരിച്ചു.
വിഴിഞ്ഞം അന്താരാഷ്ട്ര തുറമുഖം യാഥാര്‍ത്ഥ്യമാകുന്നതോടെ ബാലരാമപുരത്തിനും തലസ്ഥാന നഗരിക്കും കൂടുതല്‍ പ്രാധാന്യം ലഭിക്കുമെന്നും ആ സാഹചര്യം പ്രയോജനപ്പെടുക്കാന്‍ ബാലരാമപുരത്തെ കൈത്തറി വ്യവസായികള്‍ ശ്രമിക്കണമെന്നും യോഗത്തില്‍ മുഖ്യ പ്രഭാഷണം നടത്തിയ
കേന്ദ്ര വിദേശകാര്യ സഹമന്ത്രി വി.മുരളീധരന്‍ പറഞ്ഞു. ഫാം ടൂറിസം പോലെ കൈത്തറി ടൂറിസത്തിനും കൂടുതല്‍ പ്രാധാന്യം ലഭിക്കുമെന്നും അത്തരത്തിലുള്ള മാറ്റങ്ങള്‍ പ്രയോജനപ്പെടുത്തണമെന്നും കേന്ദ്ര സഹമന്ത്രി കൂട്ടിചേര്‍ത്തു.
എം. വിന്‍സന്റ് എം.എല്‍.എ അധ്യക്ഷത വഹിച്ച ചടങ്ങില്‍ നബാര്‍ഡ് ഡെപ്യൂട്ടി മാനേജിങ് ഡയരക്ടര്‍ കെ.വി ഷാജി പദ്ധതി വിശദീകരികച്ചു. സിസ്സ ജനറല്‍ സെക്രട്ടറി ഡോ.സുരേഷ് കുമാര്‍.സി സംസാരിച്ചു. ബി.എച്ച് പി.സി.എല്‍ ചെയര്‍മാന്‍ ഗോപകുമാര്‍ സ്വാഗതവും ഡയരക്ടര്‍ ബി.എച്ച് ശ്രീകല നന്ദിയും പറഞ്ഞു. നബാര്‍ഡിന്റെ പരിപൂര്‍ണ്ണ പിന്തുണയോടെ സിസ്സയുടെ നേതൃത്വത്തിലാണ് ബാലരാമപുരം ഹാന്റ്‌ലൂം പ്രൊഡ്യൂസര്‍ കമ്പനി രൂപീകരിച്ചിരിക്കുന്നത്. ബാലരാമപുരം കൈത്തറി ഉല്‍പ്പന്നങ്ങള്‍ക്ക് കൂടുതല്‍ വിപണി സാധ്യത കണ്ടെത്തി നല്‍കുന്നതിന് വേണ്ടിയാണ് ഈ കമ്പിനിയുടെ രൂപീകരണം കൊണ്ട് ലക്ഷ്യമിടുന്നത്.
