കോഴിക്കോട്: കോഴിക്കോട് കോര്‍പറേഷന്‍ ഇ.എം.എസ് സ്റ്റേഡിയത്തില്‍ കഴിഞ്ഞ ദിവസം നടന്ന കേരള വനിതാ ലീഗ് ഫുട്ബോള് മത്സരത്തില്‍ ഡോണ്‍ബോസ്‌കോ ഫുട്ബോള് അക്കാദമിക്ക് ദയനീയ പരാജയം. ഏകപക്ഷീയമായ ആറു ഗോളുകള്‍ക്ക് ഗോകുലം കേരള എഫ്.സി ഡോണ്‍ബോസ്‌കോയെ തകര്‍ത്തു. 18, 25, 81 മിനിട്ടുകളില്‍ ഗോളുകള്‍ നേടി ഗോകുലത്തിന്റെ 10-ാം നമ്പര്‍ വിവിയന്‍ കൊനെഡു അഡ്ജെ ഹാട്രിക് നേടി. ഹര്‍മിലന്‍ കൗര്‍ 66,81 മിനിട്ടുകളിലായി രണ്ടു ഗോളുകളും മാനസ 72-ാം മിനിട്ടിലും ഗോള്‍ നേടി ഗോകുലത്തിന്റെ ഗോള്‍ പട്ടിക തികച്ചു. ഗോഗുലത്തിന്റെ മുന്നില്‍ പകച്ചു നില്‍ക്കുന്ന ഡോണ്‍ബോസ്‌കോയെയാണ് കളിയിലുടനീളം കണാനായത്. പ്രതിരോധനിര ഭേദിച്ച് ഗോകുലത്തിന്റെ ഗോള്‍ മുഖത്തേക്ക് രണ്ടു തവണ മാത്രമാണ് ഡോണ്‍ബോസ്‌കോയ്ക്കു മുന്നേറാനായത്.
