ഫറോക്ക്: സി.പി.ഐ കോഴിക്കോട് ജില്ലാ സെക്രട്ടറിയായി കെ.കെ ബാലനെ ഫറോക്കില്‍ ചേര്‍ന്ന ജില്ലാ സമ്മേളനം തെരഞ്ഞെടുത്തു. 39 അംഗ ജില്ലാ കൗണ്‍സിലിനേയും സമ്മേളനം തെരഞ്ഞെടുത്തു. നിലവില്‍ ജനയുഗം കോഴിക്കോട് യൂണിറ്റ് മാനേജരും സി.പി.ഐ ജില്ലാ എക്‌സിക്യൂട്ടീവ് അംഗവുമായി പ്രവര്‍ത്തിച്ചുവരികയായിരുന്നു കെ.കെ ബാലന്‍. വിദ്യാര്‍ഥി പ്രസ്ഥാനമായ എ.ഐ.എസ്.എഫിലൂടെയാണ് അദ്ദേഹം രാഷ്ട്രീയത്തിലേക്ക് കടന്നുവന്നത്. എ.ഐ.വൈ.എഫ് ജില്ലാ സെക്രട്ടറി, സംസ്ഥാന എക്‌സിക്യൂട്ടീവ് അംഗം, എ.കെ.എസ്.ടി.യു സംസ്ഥാന വൈസ് പ്രസിഡന്റ് കലിക്കറ്റ് യൂണിവേഴ്‌സിറ്റി സെനറ്റ് അംഗം, സി.പി ഐ പേരാമ്പ്ര മണ്ഡലം സെക്രട്ടറി എന്നീ നിലകളിലും പ്രവര്‍ത്തിച്ചു. ചിങ്ങപുരം സി.കെ.ജി.എം ഹൈസ്‌കൂളില്‍ അധ്യാപകനായിരുന്നു. ഷൈലജയാണ് ഭാര്യ. ഷെജിന, ലെജിന എന്നിവര്‍ മക്കളാണ്.
