കോഴിക്കോട്: ഓണം ഖാദി ജില്ലാതല മേള ഉദ്ഘാടനം ചെറൂട്ടി റോഡ് ഖാദിഗ്രാമ വ്യവസായ ഓഫിസ് അങ്കണത്തില്‍ തോട്ടത്തില്‍ രവീന്ദ്രന്‍ എം.എല്‍.എ നിര്‍വഹിച്ചു. വിപണിയുടെ മാറ്റം മനസിലാക്കി ഖാദി ഉല്‍പ്പന്നങ്ങളും പരിഷ്‌കരിക്കണമെന്നും ബോര്‍ഡ് വൈസ് ചെയര്‍മാന്‍ പി.ജയരാജന്റെ നേതൃത്വത്തില്‍ നടക്കുന്ന പ്രവര്‍ത്തനം ശ്ലാഘനീയമാണെന്നും അദ്ദേഹം പറഞ്ഞു. സ്വദേശി ഉല്‍പ്പന്നങ്ങളെ പ്രോത്സാഹിപ്പിച്ച് തൊഴില്‍ സാധ്യതകള്‍ വിപുലീകരിക്കണമെന്നും അദ്ദേഹം കൂട്ടിച്ചേര്‍ത്തു. ജില്ലാ പഞ്ചായത്ത് പ്രസിഡന്റ് ഷീജ ശശി അധ്യക്ഷത വഹിച്ചു. ജില്ലാ കലക്ടര്‍ ഡോ.എന്‍. തേജ്‌ലോഹിത് റെഡ്ഢി ആദ്യ വില്‍പ്പന ഉദ്ഘാടനം ചെയ്തു. സമ്മാന കൂപ്പണ്‍ വിതരണോദ്ഘാടനം ജയപ്രസാദ്(മുന്‍ വൈസ് ചാന്‍സലര്‍, കാലടി സര്‍വകലാശാല) നിര്‍വഹിച്ചു. കൗണ്‍സിലര്‍ എസ്.കെ അബൂബക്കര്‍, കേരള സര്‍വോദയ സംഘം ചെയര്‍മാന്‍ യു.രാധാകൃഷ്ണന്‍, കോഴിക്കോട് സര്‍വോദയ സംഘം സെക്രട്ടറി വി.വി വിശ്വന്‍ ആശംസകള്‍ നേര്‍ന്നു. ഖാദി ബോര്‍ഡ് ഡയരക്ടര്‍ കെ.പി ദിനേഷ്‌കുമാര്‍ സ്വാഗതവും പ്രോജക്ട് ഓഫിസര്‍ കെ.ഷിബി നന്ദിയും പറഞ്ഞു.
