കോഴിക്കോട്: 19ാമത് സാവിത്രി ദേവി സാബു ജൂനിയര്‍ സ്റ്റേറ്റ് ബാഡ്മിന്റണ്‍ റാങ്കിങ് ടൂര്‍ണമെന്റിന് ഇന്ന് സമാപനം കോഴിക്കോട് സെന്റ് ജോസഫ് ദേവഗിരി ഇന്‍ഡോര്‍ സ്റ്റേഡിയത്തില്‍ നടക്കുന്ന മത്സരത്തില്‍ സംസ്ഥാനത്തെ വിവിധ ജില്ലകളില്‍ നിന്നായി 17ഉം 19ഉം വയസ് പ്രായമുള്ള 300 ഓളം പേര്‍ പങ്കെടുത്തു. രാവിലെ 9.30ന് തുടങ്ങുന്ന ഫൈനല്‍ റൗണ്ടില്‍ 20 മത്സരാര്‍ത്ഥികള്‍ പങ്കെടുക്കും. സിംഗിള്‍സില്‍ അണ്ടര്‍ 17ലും അണ്ടര്‍ 19ലും നാല് വീതം മത്സരങ്ങളും രണ്ട് വീതം സംയുക്ത മത്സരങ്ങളും നടക്കും. ഇതില്‍ നിന്നും ഫൈനല്‍ വിജയികളെ കണ്ടെത്തും. വിജയികളുടെ റാങ്കിങിന്റെ അടിസ്ഥാനത്തിലാകും കേരള ടീമിലേക്ക് തിരഞ്ഞെടുക്കുക.
ഉച്ചയ്ക്ക് 12 ഓടെ നടക്കുന്ന സമാപന ചടങ്ങില്‍ വിജയികള്‍ക്ക് ക്യാഷ് പ്രൈസും ട്രോഫിയും വിതരണം ചെയ്യും. സ്‌പോര്‍ട്‌സ് കൗണ്‍സില്‍ പ്രസിഡന്റ് ഒ. രാജഗോപാല്‍ മുഖ്യാതിഥിയാകും. ബാഡ്മിന്റണ്‍ അസോസിയേഷന്‍ ജില്ലാ പ്രസിഡന്റ് സഞ്ജീവ് സാബു അധ്യക്ഷത വഹിക്കുന്ന ചടങ്ങില്‍ സാവിത്രി ദേവി സാബു ചാരിറ്റബിള്‍ ട്രസ്റ്റ് ചെയര്‍മാന്‍ അലോക് കുമാര്‍ സാബു, ജോയിന്റ് സെക്രട്ടറി എ.വി ബിനോയ് പങ്കെടുക്കും.
