ജാമ്യത്തില്‍ വിട്ടു
കൊച്ചി: യുവനടിയെ പീഡിപ്പിച്ച കേസില്‍ പ്രതിയായ വിജയ് ബാബുവിനെ പോലിസ് അറസ്റ്റ് ചെയ്തു. ചോദ്യം ചെയ്യലിന് ഹാജരായപ്പോഴായിരുന്നു അറസ്റ്റ് ചെയ്തത്. ചോദ്യം ചെയ്യലിന് ശേഷം അറസ്റ്റ് രേഖപ്പെടുത്തി വിട്ടയയ്ക്കും. മുന്‍കൂര്‍ ജാമ്യവ്യവസ്ഥകള്‍ പ്രകാരമാണ് വിടുന്നത്. അന്വേഷണവുമായി സഹകരിക്കണം എന്ന് മുന്‍കൂര്‍ ജാമ്യത്തില്‍ നിര്‍ദേശിച്ചിരുന്നു. ഇതേ തുടര്‍ന്നാണ് ഇന്ന് ചോദ്യം ചെയ്യലിനായി ഹാജരായത്. ആവശ്യമായി വന്നാല്‍ അന്വേഷണ സംഘത്തിന് നടനെ അറസ്റ്റ് ചെയ്യാവുന്നതാണ്. അറസ്റ്റ് ചെയ്യുകയാണെങ്കില്‍ സ്റ്റേഷന്‍ ജാമ്യത്തില്‍ വിടണമെന്നുമായിരുന്നു കോടതി നിര്‍ദേശം. അറസ്റ്റ് രേഖപെടുത്തിയാല്‍ അഞ്ച് ലക്ഷം രൂപയുടെ ബോണ്ടും രണ്ട് ആള്‍ ജാമ്യവും എന്ന വ്യവസ്ഥയില്‍ ജാമ്യം നല്‍കാനാണ് കോടതി നിര്‍ദേശിച്ചത്.
ഇന്ന് മുതല്‍ ജൂലൈ മൂന്നു വരെ, രാവിലെ ഒന്‍പത് മുതല്‍ വൈകിട്ട് ആറ് മണി വരെയാണ് ചോദ്യം ചെയ്യാന്‍ അനുമതി. അതേസമയം ചോദ്യം ചെയ്യല്‍ പുരോഗമിക്കുകയാണ്. ഈ ദിവസങ്ങളില്‍ ചോദ്യം ചെയ്യലിന് ഒപ്പം തെളിവെടുപ്പും നടക്കും.
യുവനടി ഏപ്രില്‍ 22നാണ് വിജയ് ബാബുവിനെതിരേ പീഡന പരാതി നല്‍കിയത്. തുടര്‍ന്ന് വിജയ് ബാബു ദുബായിലേക്ക് ഒളിവില്‍ പോകുകയായിരുന്നു. 39 ദിവസത്തിന് ശേഷം ഈ മാസം ഒന്നിനാണ് കൊച്ചിയില്‍ തിരിച്ചെത്തിയത്.
