കെ.എം.സി.ടി. സെന്റര്‍ ഫോര്‍ ഡിജിറ്റല്‍ ഡെന്റിസ്ട്രി ഉദ്ഘാടനത്തിന് ഒരുങ്ങുന്നു
മുക്കം: ഡിജിറ്റല്‍ ഡെന്റിസ്ട്രിയുടെ ഉപയോഗവും അതിന്റെ പ്രായോഗിക സാധ്യതകളും വര്‍ദ്ധിച്ചുവരുന്ന സാഹചര്യത്തില്‍, ഏറ്റവും പുതിയ സാങ്കേതിക വിദ്യകളോടെയും ആധുനിക സജ്ജീകരണങ്ങളോടെയും, കെ.എം.സി.ടി. ഡെന്റല്‍ കോളേജില്‍ രൂപീകരിച്ചിട്ടുള്ളതാണ് കെ.എം.സി.ടി. സെന്റര്‍ ഫോര്‍ ഡിജിറ്റല്‍ ഡെന്റിസ്ട്രി. ഈ സെന്റര്‍ മുഖേന, കമ്പ്യൂട്ടര്‍ ഉപയോഗിച്ചുള്ള ദന്ത ചികില്‍സ സേവനങ്ങള്‍ക്കും വിദ്യാഭ്യാസത്തിനും ഉയര്‍ന്ന നിലവാരത്തിലുള്ള സൗകര്യങ്ങള്‍ ഉറപ്പാക്കുകയാണ് ലക്ഷ്യം.
ഡിജിറ്റല്‍ ടെക്‌നോളജി എല്ലാ മേഖലകളിലും വിപ്ലവകരമായ മാറ്റങ്ങള്‍ക്കു വഴിയൊരുക്കുമ്പോള്‍, 3-ഡി സംവിധാനങ്ങള്‍, കമ്പ്യൂട്ടര്‍ ഉപയോഗിച്ചുള്ള ഡിസൈന്‍ രീതികള്‍, തുടങ്ങിയ അത്യാധുനിക സംവിധാനങ്ങള്‍ വഴി കൃത്രിമദന്ത പരിചരണം കൂടുതല്‍ കൃത്യതയും കാര്യക്ഷമതയും ഉറപ്പാക്കുന്നതില്‍ കെ.എം.സി.ടി. സെന്റര്‍ ഫോര്‍ ഡിജിറ്റല്‍ ഡെന്റിസ്ട്രി മുതല്‍ക്കൂട്ടായി മാറും.
ഈ വിഭാഗത്തില്‍ കാഡ് ഡന്റ് ലാബ് (കമ്പ്യൂട്ടര്‍ ഉപയോഗിച്ചുള്ള ഡിസൈന്‍ സംവിധാനം), 3-ഡി പ്രിന്റിംഗ് ലാബ്, അത്യാധുനിക സൗകര്യങ്ങളോടെ ഒരു ട്രെയിനിംഗ് സെന്റര്‍, സെറാമിക് ലാബ്, ഡിസൈന്‍ സ്റ്റുഡിയോ, മില്ലിങ് യൂണിറ്റ്, മോഡല്‍ നിര്‍മ്മാണ മേഖല എന്നിവ ഉള്‍പ്പെടുന്ന അത്യാധുനിക സൗകര്യങ്ങളും ഒരുക്കിയിട്ടുണ്ട്.
ആദ്യ ഘട്ടത്തില്‍ കൃത്രിമ ദന്ത വിഭാഗം ചികിത്സാ രീതികളോടെ പ്രവര്‍ത്തനം ആരംഭിക്കുന്ന സെന്ററില്‍ തുടര്‍ന്നുള്ള ഘട്ടങ്ങളില്‍ ഡിജിറ്റല്‍ സാങ്കേതിക വിദ്യയുടെ സഹായത്തോടെ ആസൂത്രണം ചെയ്യുന്ന ഓര്‍ത്തോഡോണ്ടിക് അലൈനറുകള്‍, മാക്‌സിലോഫേഷ്യല്‍ സര്‍ജറി, ഡെന്റല്‍ ഇമ്പ്‌ലാന്റ് തുടങ്ങിയ ചികിത്സകളും നടപ്പിലാക്കും.
പുതുതായി നിര്‍മിച്ച കെ.എം.സി.ടി. സെന്റര്‍ ഫോര്‍ ഡിജിറ്റല്‍ ഡെന്റിസ്ട്രിയുടെ ഉദ്ഘാടനം മാര്‍ച്ച് 3ന് രാവിലെ 10 മണിക്ക് കെ.എം.സി.ടി. ഡെന്റല്‍ കോളേജ് മിനി ഓഡിറ്റോറിയത്തില്‍ വെച്ച് നടക്കും. ഗുരു ഗോബിന്ദ് സിങ് ഇന്ദ്രപ്രസ്ഥ യൂണിവേഴ്‌സിറ്റി വൈസ് ചാന്‍സ്ലര്‍ പദ്മശ്രീ ഡോ. മഹേഷ് വര്‍മ ഉദ്ഘാടന കര്‍മ്മം നിര്‍വഹിക്കും. കേരള യൂണിവേഴ്‌സിറ്റി ഓഫ് ഹെല്‍ത്ത് സയന്‍സസ് കണ്‍ട്രോളര്‍ ഓഫ് എക്‌സാമിനേഷന്‍സ് ഡോ. അനില്‍ എസ്. കുമാര്‍ വിശിഷ്ടാതിഥിയാകും.
ഗ്രൂപ്പ് ഓഫ് ഇന്‍സ്റ്റിറ്റിയൂഷന്‍സ് ചെയര്‍മാന്‍ ഡോ. നവാസ് കെ.എം., എക്‌സിക്യൂട്ടീവ് ട്രസ്റ്റീ ആന്‍ഡ് ഡയറക്ടര്‍ ഡോ. ആയിഷ നസ്രീന്‍, ഡെന്റല്‍ കോളേജ് പ്രിന്‍സിപ്പാള്‍ ഡോ.മനോജ് കുമാര്‍ കെ.പി., ഐ.പി.എസ്. കേരള സ്റ്റേറ്റ് ബ്രാഞ്ച് പ്രസിഡന്റ് ഡോ. രൂപേഷ് പി.എല്‍., വിവിധ ഡിപ്പാര്‍ട്‌മെന്റ് മേധാവികള്‍, അധ്യാപകര്‍, അനധ്യാപകര്‍, വിദ്യാര്‍ത്ഥികള്‍ തുടങ്ങിയവര്‍ ചടങ്ങില്‍ പങ്കെടുക്കും. ഡോ. ആയിഷ നസ്രീന്‍, ഡോ.മനോജ് കുമാര്‍, പ്രൊസ്‌തോഡോണ്ടിക്‌സ് വിഭാഗം പ്രൊഫസര്‍ ആന്‍ഡ് ഹെഡ് ഡോ.ഷീജിത്ത്, ഡെന്റല്‍ കോളേജ് അഡ്മിനിസ്‌ട്രേറ്റര്‍ സുജാത.എസ്, എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.
